Қарағанды тұрғындары ОҚО-да лаңкестік жасауға әрекеттенгені үшін сотталды

ШЫМКЕНТ. ҚазАқпарат - Лаңкестік жасамақшы болған Қарағанды тұрғындары ұзақ мерзімге сотталды, деп хабарлады «ҚазАқпарат» ХАА тілшісі. Бұл атышулы үрдіс қылмыстық істер жөніндегі мамандандырылған ауданаралық сотта жабық режімде өтті. Үкім шығарылғаннан кейін баспасөз қызметі үкімді жариялады.

«Сот үкімімен топ жетекшісі Самат Жолдыбаев 9 жылға, Александр Кривоносов -  8 жылға,  Асиф Токарев 4 жыл 9 ай қатаң режімдегі колонияда жазаларын өтейтін болады», - деді ОҚО сотының өкілі Нұрсұлу Жораева. Сот талқылауы барысында Жолдыбаев пен Кривоносов елде тыйым салынған «ДАИШ» лаңкестік ұйымының мүшесі болғаны анықталды.

Үшінші сотталушының да компьютерінде экстремистік сипаттағы материалдар болған.  Сот қазан айының ортасында басталды. Ер адамдарға ҚК 4-бабы бойынша айып тағылды: 192 (қарақшылық), 256 (Терроризмді насихаттау) және 432 (Қылмысты жасыру). Іс материалы бойынша Алмас Байділдаевтің тапсырмасымен Қарағанды тұрғындары Шымкентке келеді.

Мұнда олар лаңкестік жасауды жоспарлаған, алайда  қылмыскерлерге ақша қажет болады. Олар Байділдаевтің өкімі бойынша ақшаны бизнесменнен тартып алулары тиіс. 57 жастағы бизнесмен Бауыржан Әбдубаев сотқа жәбірленуші ретінде қатысты. Ер адамның отбасын қылмыскерлер тәулік бойы торуылдаған. Алайда іске арнайы қызмет қызметкерлері араласып, жоспарлаған істерін аяғына дейін жеткізуге мүмкіндік бермеді.