2013 жылдың желтоқсан айының соңында сағат 13.30-да бетперде киген үш белгісіз тұлға Қарағанды қаласының ЖШС-нің бірінің кеңсесіне басып кірген. Қаскүнемдер қару-жарақпен қорқытып, зорлық-зомбылық көрсетіп, жалпы сомасы 6 857 000 теңгені құрайтын ақшалай қаражатты иемденген.
Аталған жайтқа байланысты ҚР ҚК-нің 192-бабы 4-бөлімі бойынша қылмыстық іс қозғалды.
2014 жылдың басында жедел-іздестіру іс-шаралары барысында полиция қызметкерлері аталған қылмыстқа қатысы бар деген күдікпен Қарағанды қаласының екі тұрғынын анықтап, ұстаған болатын. Қазіргі уақытта олар сотталып, қылмыстық-атқару жүйесі мекемелерінде жазасын өтеп жатыр.
«Үшінші күдіктіге тергеу органдары іздеу жариялады. Жеті жылдан кейін 8 маусымда Қарағанды облысы ПД криминалдық полиция басқармасының қызметкерлері Алматы облысы Жетісу ауданының ПД қызметкерлерімен бірлесе отырып, Алматы облысы Бірлік ауылында қарақшылық жасаған 34 жастағы күдіктіні анықтап, ұстады», - деп хабарлады Қарағанды облысы ПД бастығы, полиция полковнигі Ерлан Файзуллин.
Қазіргі уақытта ұсталған азамат уақытша ұстау изоляторына қамалып, тергеу амалдары жүргізілуде.