Қарағанды облысының ПД және облыстық жастар саясаты мәселелері басқармасы ынтымақтастық және өзара іс-қимыл туралы өзара меморандум жасасты.
Құжатқа облыстық ПД бастығының міндетін атқарушы Әбіл Әбілдин мен жастар саясаты мәселелері басқармасының басшысы Біржан Әлімжанов қол қойды.
Аталмыш меморандумның мәні ІТ-қауіпсіздік жобаларын іске асыруға және облыста киберволонтерлер қозғалысын дамытуға бағытталған полиция мен жастар арасындағы әріптестік қатынастарды орнату және ұзақ мерзімді ынтымақтастықты дамыту болып табылады.
«Қазіргі уақытта интернеттегі алаяқтық - қылмыстың ең көп таралған түріне айналды. Жыл басынан бері біздің облыста осындай 903 құқық бұзушылық тіркелді. Ал өткен жылы – 428. Бұл құбылыспен заманауи әдіс-тәсілдермен күресу керек. Сондықтан біз сіздердің тараптан кез келген көмекті, идеяларды, ұсыныстарды қарастырамыз. Киберволонтерлер қозғалысы – серіктестіктің жаңа нысаны, белсенді азаматтық позицияның және біздің тұрғындардың әлеуметтік жауапкершілігінің мысалы. Және оған қатыса отырып, Қарағанды ЖОО студенттері – болашақ цифрлық және компьютерлік технологиялар мамандары – өз теориялық білімдерін іс жүзінде толық көлемде қолдана алады», - деп атап өтті Әбіл Әбілдин.
«Киберволонтерлерді дайындау - көп еңбекті талап ететін процесс. Қозғалысқа қатысуға дайын дарынды балалар бар. Біз полицейлерге интернет қылмыстарымен күресуге көмектесу үшін қолдан келгеннің бәрін жасаймыз», - деді Біржан Әлімжанов.