Қарасай ауданы Әйтей ауылындағы Б.Қосынов атындағы орта мектеп апатты жағдайда болуына байланысты 2018 жылы аудан әкімі Жандарбек Далабаевтың қолдауымен 3,5 гектар жер телімі бөлініп, мемлекеттік-жекешелік әріптестік аясында 1200 орындыққа арналған білім ордасы бой көтерді. Аталмыш мектептің құрылысы толық аяқталып, әйтейлік оқушылар алдағы оқу жылында жаңа мектепте білімдерін жалғастыратын болады.
15 мектептің құрылысы 2021 жылға жоспарланған.
«Облыста 17 мектептің құрылысы жүріп жатыр. Осы арқылы үш ауысымды мектептердің қатары азаяды деп отырмыз. Айта кету керек, жалпы сипаттағы трансферттер есебінен 11 мектеп, «Жұмыспен қамтудың жол картасы-2020« бағдарламасы бойынша 6 мектептің құрылысы жүргізілуде»,- деді Алматы облыстық білім басқармасының басшысы Майгүл Омарова.
Бұдан басқа, Жұмыспен қамтудың жол картасы бойынша 1500 орындық тағы 6 мектеп және 29,9 млрд теңге сомасына 1200 орындық 1 мектеп салу көзделген.
Білім беру ісіндегі жағымды жаңалықтардың легі мұнымен толастамақ емес. Кеген ауданы, Саты ауылында 1 қыркүйекке дейін 2520 орындық 5 мектеп пайдалануға беріледі. Осы тектес жұмыстар облыстың өзгеде аймағы, Жамбыл, Ескелді, Кербұлақ аудандарында жыл соңына дейін 560 орындық 3 мектеп ашылады.
2020 жылы 23,9 млрд теңге сомасына 55 білім беру ошағы күрделі жөндеуден өтуде.
Бүгінгі күні 55 шарттың 55-і жасалды, барлық нысандар бойынша өндіріс кестесіне сәйкес жөндеу жұмыстары жүргізілуде.
Нақтылап өтер болсақ, жергілікті бюджет есебінен 8 нысанға күрделі жөндеу жүргізілуде. Оның ішінде 6 мектеп, 2 балабақша бар. Бұл мақсатта 1,9 млрд теңге қаржы қарастырылған.
Ал, «Ауыл ел бесігі» бағдарламасы аясында 10 нысанға 4,5 млрд теңгеге күрделі жөндеу жұмыстары жүргізілуде.
«Жұмыспен қамтудың жол картасы» бағдарламасы шеңберінде 37 нысанға күрделі жөндеу жүргізілуде, оған 28 мектеп, 5 мектеп, 2 колледж, 2 балабақша аумақтарын абаттандыру жатады.
Еске салар болсақ, 42 мектептің барлық жөндеу жұмыстары биылғы жылдың 20 қыркүйегіне дейін аяқталады.
Сондай-ақ 1,2 млрд теңге сомасына 347 мектептің дәретханалары ағымдағы жөндеуден өтті. Өңірдегі білім беру ошақтары осылайша білім күніне дайындығын арттырып жатыр. Бұл ретте оқушылардың жағдайы назардан тыс қалған жоқ.
Облыстағы шалғай елді мекендерден оқушыларды тасымалдау ұйымдастырылған.
Осы мақсатта жергілікті бюджеттен 71 автобус сатып алуға 940,6 млн теңге бөлінді. Бүгінгі күні 61 автобус сатып алынды.
Қалған 10 автобус қыркүйек айының соңына дейін сатып алынады.