АСТАНА. KAZINFORM — Испаниялық теннисші Карлос Алькарас теннистен АҚШ ашық чемпионатының жеңімпазы атанды.
Испаниялық спортшы финалда әлемнің 1-ракеткасы, италиялық Янник Синнерді ұтты — 6:2, 3:6, 6:1, 6:4.
Осылайша, К.Алькарас Я.Синнерді бір маусым барысында «Үлкен дулыға» турнирінің финалында екінші рет жеңді. Бұған дейін ол Ролан Гарроста чемпион атанған еді. Сөйтіп Алькарас 1973 жылдан бергі мерзімде өзінің атақты отандасы Рафаэль Надальдың жетістігін қайталады. Р.Надаль 2008 жылы Ролан Гаррос пен Уимблдонда соңғы бәсекеде сол кезде әлемдік рейтингіде көш бастаған даңқты швейцариялық Роджер Федерерді сүріндірген болатын.
Биыл АҚШ ашық чемпионатының жартылай финалында К.Алькарас «Үлкен дулыға» турнирінің 24 дүркін чемпионы, сербиялық Новак Джоковичті жолдан тайдырды.
К.Алькарас АҚШ чемпионатынан кейін әлемдік рейтингіде Синнерді басып озып, көш басына көтерілді.
Еске сала кетейік, бұдан бұрын Новак Джоковичтің тағы бір рекордтық нәтижеге қол жеткізгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).