Бұл туралы бүгін 2013 жылғы бірінші жартыжылдық қорытындысы бойынша алқа отырысында ведомство басшысы Рашид Түсіпбеков мәлім етті, деп хабарлайды агенттіктің баспасөз қызметінен.
Оның берген мәліметінше, жалған мәмілелер жасау үстінде ұстау 3 есеге дейін көбейген. Нәтижесінде екінші деңгейлі банктерде қолма-қол ақшаға алмастырылған қаражаттың сомасы 605 млрд. теңгеден 511 млрд. теңгеге дейін немесе 16%-ғаазайған. Ал бұрын ақшаны қолма-қол ақшаға ауыстыру тұрақты түрде өсіп отырған.
Қаржы полициясының осы бағыттағы жұмысының жандануы сонымен қатар шағын және орта бизнестен бюджетке түсетін салықтардың 27%-ға артуына өз әсерін тигізді.
«Сонымен қатар, жалған және қасақана банкроттық фактілері бойынша қылмыстарды ашу 3 есеге дейін өскен, бұл банкроттыққа түсетін кәсіпорындардың бюджет алдындағы қарызының 45%-ға немесе 32 млрд. теңгеден 17 млрд. теңгеге дейін төмендеуіне ықпал етті», - деп атап өтті Р. Түсіпбеков.
Сондай-ақ, бюджеттен қосымша құн салығын заңсыз кері қайтару қылмыстарын анықтау 2,5 есе көбейген. Бұл бюджеттен қайтарылатын сомалардың азаюына әкеліп соқты. Егер 2012 жылы кәсіпкерлерге бюджеттен 450 млрд. теңге қайтарылса, осы жылдың 6 айында ол 83 млрд.теңгені құраған.