АСТАНА. ҚазАқпарат - Мәскеудегі кәсіби бокс кешінде тағы екі қазақстандық спортшы рингке шықты, деп хабарлайды ҚазАқпарат тілшісі.
Алдымен Алматы облысында туып-өскен Константин Брусенский жартылай жеңіл салмақта кәсіби бокстағы алғашқы кездесуін ресейлік Дагир Качакаевпен өткізді.
Бұл кездесу алты раундқа созылуы тиіс болатын. Константин оған жеткізбей, екінші раундта-ақ қарсыласын сұлатып салды. Нокаут!
Тағы бір қазақстандық, 25 жасар алматылық Али Балоев (7-0, 6 КО) бірінші ауыр салмақта сегіз раундтық бәсекеде Нигерия елінің өкілі Афинни Абиодунмен (6-1-1, 5 КО) шеберлік байқасты.
Кездесу барысында А.Балоевтың басымдылығы анық байқалып, оның ауыр соққылары әлсін-әлсін дарып жатты. Ақыры сегізінші раундта оң қолының соққысымен нигериялық боксшыны нокаутқа жіберді.
Еске сала кетейік,бұдан бұрын Айдос Ербосынұлы мен Нұрсұлтан Жаңабаевтың титулдық жекпе-жектерін жеңіспен аяқтағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).