Қасым-Жомарт Тоқаев Конго Президентін Ақордада қарсы алды
АСТАНА. KAZINFORM — Мемлекет басшысы Қасым-Жомарт Тоқаев Астанаға ресми сапармен келген Конго Республикасының Президенті Дени Сассу-Нгессоны Ақордада қарсы алды.
Мәртебелі мейманның сапарына орай Салтанатты рәсімдер залында құрмет қарауылы сап түзеп, оның бастығы Мемлекет басшыларына сәлемдік баянат берді.
Осыдан кейін Президент оркестрі екі елдің мемлекеттік әнұранын орындады.
Әнұрандарды тыңдап болғаннан кейін Қасым-Жомарт Тоқаев пен Дени Сассу-Нгессо кілемше бойымен Қазақстан Республикасының Мемлекеттік Туына қарай жүрді.
Оның алдына келгенде мейман тоқтап, басын сәл иіп, өзінің құрметін білдірді.
Сонан соң мейман мен Президент құрметті қарауыл сапының бойымен жүрді.
Құрметті қарауыл бастығымен қоштасты.
Қазіргі уақытта Мемлекет басшылары шағын құрамдағы кездесуге өтті.
Бұған дейін Мемлекет басшысы Қасым-Жомарт Тоқаевтың шақыруымен 2-3 тамыз күндері Конго Республикасының Президенті Дени Сассу-Нгессо Қазақстанға ресми сапармен келетіндігін жазған едік.