ОРАЛ. ҚазАқпарат - Өткен жылдың 28 желтоқсанында бетперде киген белгісіз екеу Зеленов ауданы Озерное ауылында тұратын, Орал қаласында сүт өнімдерін сатумен айналысатын кәсіпкер зейнеткерлер Тәжібаевтар үйіне басып кірген еді.
БҚО ішкі істер департаментінің баспасөз қызметінен түскен мәліметке қарағанда, сол күні шаруа қожалығының басшысы, 1943 жылғы Бектеміс Тәжібаев қалаға сүт сатуға кеткен де, үйде зайыбы, 1948 жылғы Ольга Тәжібаева қалған. Қарақшылар зейнеткерді пышақпен қорқытып, скотчпен байлап, сейфтен 500 мың теңгені алған да, табандарын жалтыратқан.
Содан бері күдіктілерді іздестіру жұмыстары жүргізіліп, олар 2 сәуір күні қолға түсті. Оның бірі көршілес Дариян ауылында тұратын 1966 жылғы Г. зейнеткерлердің алыс туысы болып шықты, ағайындарының немен айналысатынын жақсы білетін ол пайдакүнемдік мақсатпен қылмысты ұйымдастырған. Екінші күдікті, 1984 жылғы Орал қаласының тұрғыны техникалық қызмет көрсету стансаларының бірінде жұмыс істейді екен. Оқиға орнынан оларды бірінің бауыры автокөлікпен қалаға жеткізіп, «олжаларын» бөліскен.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).