Каспий-Еуропалық ықпалдастық іскерлік клубының делегациясы Астанаға сапармен келеді

АСТАНА. Қыркүйектің 3-і. ҚазАқпарат - Қазақстанның Әзірбайжан Республикасындағы елшісі Серік Пірімбетов қыркүйектің 2-сінде Каспий-Еуропалық ықпалдастық іскерлік клубының (CEIBC) президенті және бас атқарушы директоры Тельман Әлиевті қабылдады.

Әзірбайжан мен Қазақстанның арасында қалыптасқан айрықша қарым-қатынасты атап көрсеткен дипломат, сондай-ақ, Каспий-Еуропалық ықпалдастық іскерлік клубы мен Caspian Energy халықаралық медиа-тобы осы қарым-қатынастарды ақпараттық деңгейде дамытуға қомақты үлес қоса алатынын айтты.

Кездесуде Каспий-Еуропалық ықпалдастық іскерлік клубы делегациясының алдағы қазан айының бірінші жартысында Астанаға жасағалы отырған сапары талқыланды. Бұл сапардың барысында ҚР Премьер-Министрі Кәрім Мәсімовпен кездесу жоспарланған. Делегацияның Астанаға сапарының аясында сондай-ақ, Қазақстанның аумағында Клубтың өкілдігін құру мәселесі талқыланбақ.

Тараптар сонымен бірге, Каспий-Еуропалық ықпалдастық іскерлік клубы делегациясының KAZENERGY корпорациясы өткізетін KAZENERGY Еуразиялық форумына кеңінен қатысу мүмкіндігін талқылады.