Каспий құбыр консорциумы арқылы мұнай жөнелтуде шектеу жоқ – Энергетика министрлігі

АСТАНА. KAZINFORM – Еліміздің Энергетика министрлігі Каспий құбыр консорциумы қызметіне қатысты тағы түсінік берді.

- Қазақстан Республикасы Энергетика министрлігі Каспий құбыр консорциумы (КҚК) жүйесіне қазақстандық мұнайды қабылдауға қазір ешқандай шектеу жоқ екенін хабарлайды. Мұнай жөнелту бекітілген кестеге сәйкес жұмыс істеп тұрған ВПУ-3 қондырғысы арқылы қалыпты режимде жүзеге асырылып жатыр, - делінген министрліктің баспасөз қызметі таратқан хабарламада.

Сондай-ақ аталған ведомство мәселені бақылауда ұстап, қазақстандық мұнайдың үздіксіз экспортталуын қамтамасыз ету мақсатында барлық мүдделі тараппен тұрақты өзара іс-қимыл жасап жатқанын мәлімдеп отыр.

Бұған дейін Каспий құбыр консорциумына дрон шабуылынан кейін мұнай айдау станциясын қалпына келтіріп жатқаны туралы хабарлаған едік. 

Еске салайық, биыл 17 ақпанда аталған мұнай айдау стансасына дронмен шабуыл жасалды. 

Сондай-ақ Қазақстан аталған мәселені Украинамен талқылайтыны айтылды.