Каспий теңізінің жағалауында мобильді бекеттер орнатылды
АҚТАУ. KAZINFORM – Шомылу маусымы қарсаңында Ақтаудағы Каспий теңізінің жағалауындағы танымал демалыс аймақтарындағы акваторияның түбіне зерттеу жүргізілді. Шомылуға арналған Қауіпсіз учаскелер анықталды, жағажайлар тазартылды, суда жүріс-тұрыс ережелері бар ескерту белгілері мен ақпараттық қалқандар орнатылды.
Ақтау мен оның маңайындағы аудандарда құтқарушылардың мобильді бекеттері орнатылды. Барлық қажетті затпен: құтқару шеңберлерімен, қайықтармен, байланыс құралдарымен және дәрі қобдишаларымен қамтамасыз етілген құтқару қызметтерінің қызметкерлері теңіз жағалауында кезекшілік етеді. Күнделікті патрульдер өткізіледі.
Құтқарушылар мен волонтерлер халық арасында түсіндіру жұмыстарын жүргізеді. Теңіз жағасында қауіпсіз демалу үшін жаднамалар мен буклеттер таратылады. Мектептерде, аула клубтарында және лагерьлерде балалармен тақырыптық сабақтар өткізіледі.
Күшті ағындарға, толқындарға, тастарға немесе тік жағалауларға байланысты шомылуға тыйым салынған жерлерде рейдтер ұйымдастырылды. Суда жүріс-тұрыс ережелерін бұзушыларға ескерту жасалады, кәмелетке толмағандардың ата-аналарымен әңгімелер жүргізіледі.
Шағын көлемді кемелердің иелеріне арналған нұсқаулықтар үнемі өткізіліп тұрады. Құтқару кеудешелерін кию және акваторияға шығу ережелерін сақтау мәселелеріне ерекше назар аударылады.
Жағалау аумақтары екі қаланы — Ақтау мен Жаңаөзенді, сондай-ақ Қарақия және Түпқараған аудандарын қамтиды. Осы елді мекендердің әрқайсысында Маңғыстау облысы ТЖД жедел-құтқару жасағының судағы төтенше жағдайларға патрульдеуге, алдын алуға және ден қоюға жұмылдырылған құтқару бөлімшелері бар.
Ақтау ауданындағы Каспий теңізі акваториясының ерекшеліктері: жағалауға жақын тереңдіктің күрт өзгеруі; суасты ағындарының болуы; дауылды ауа-райында шомылу кезіндегі қауіп; шомылуға тыйым салынған техникалық объектілер мен су бұрғыштардың болуы.
Еске сала кетейік, бұған дейін Ақтауда Каспий теңізіне Қызыл кітапқа енген албырт шабақтары жіберілгенін жазған едік.