Қасым-Жомарт Тоқаев бірқатар еуропалық компаниялардың жетекшілерімен кездесті
17:36, 26 Қараша 2021
НҰР-СҰЛТАН. ҚазАқпарат - Мемлекет басшысы Брюссельде еуропалық бизнес өкілдерімен, атап айтқанда бельгиялық «Joh Cockerill» компаниясының басқарма төрағасы Жан-Люк Моранжбен және немістің «Svevind Group» компаниялар тобының президенті Вольфганг Кроппен кездесті, деп хабарлайды Ақорданың баспасөз қызметі.
Вольфганг Кроппен кездесуде Маңғыстау облысында «жасыл» сутегі өндірісі саласындағы Hyrasia One инвестициялық жобасын жүзеге асыру мәселесі сөз болды.
Қасым-Жомарт Тоқаев бұған дейін қолға алынған инвестициялық жобалардың қарқынды жүзеге асырылып жатқанына жоғары баға беріп, олардың Қазақстан үшін аса маңызды екенін атап өтті. Мемлекет басшысы елімізде жұмыс істейтін компаниялардың жобаларының жүзеге асырылу барысын өз бақылауына алатынын айтты. Бұл ретте барлық экологиялық нормативтер мен нұсқаулардың сақталуы қажет екенін жеткізді.
Кездесу соңында Мемлекет басшысының қатысуымен Қазақстан Үкіметі мен «Svevind Group» компаниялар тобының арасында Жобаларды іске асырудың негізгі қағидаттары туралы шекті келісімге қол қою рәсімі өтті.