«Левски» бас бапкері Хулио Веласкес жауапты кездесу алдында ыстық ауа райына алаңдаулы екенін мәлімдеді.
– Аптап ыстық – ескеретін фактор. Сол себепті матчқа ертерек келіп, ауа райына бейімделуге тырыстық. Дегенмен сылтау іздемейміз. Біз алаңға ойнау үшін шығамыз, – деді испаниялық маман.
Бас бапкер «Қайраттың» ойын мәнеріне де тоқталып, алматылық клубтың тактикалық өзгерістеріне дайын болу керектігін жеткізді.
– Олар қарсыластың алаңында қысым көрсетіп, кейін орта немесе төмен қорғаныс шебіне ауыса алады. Сондықтан олардың орналасуына қарай шабуылда дұрыс жауап беруге тиіспіз. Доп қарсыласта болған кезде де сауатты қорғануымыз қажет, – деді ол.
«Левскидің» бразилиялық шабуылшысы Рейналдо алғашқы кездесудегі басымдықты сақтап қалу үшін команда соңына дейін күресетінін атап өтті.
– Бізде артықшылық бар, бірақ босаңсуға болмайтынын жақсы түсінеміз. Климаттық жағдай екі команда үшін де бірдей, сондықтан оған бейімделіп, ойнауымыз керек, – деді Рейналдо.
Ал «Қайрат» бас бапкері Рафаэль Уразбахтин алғашқы кездесудегі жеңіліске қарамастан, команда қарымта матчта есе қайтаруға дайын екенін айтты.
– Кез келген жеңіліс жағымсыз әсер қалдырады. Әсіресе соңғы минуттарда гол жіберіп алғанымыз жігіттердің көңіл күйіне әсер етті. Дегенмен командада жігер бар. Қарымта кездесуде жеңіс үшін бар күшімізді саламыз, – деді Уразбахтин.
Бас бапкер «Қайраттың» алдағы ойында шабуылда белсенді әрекет ететінін жеткізді.
– Қарсыластың жылдам ойыншылары бар. Сондықтан шабуыл мен қорғаныс арасындағы тепе-теңдікті сақтап, сауатты ойын көрсетуіміз қажет, – деді Уразбахтин.
Команданың дайындығы туралы «Қайрат» ойыншысы Олжас Байбек те пікір білдірді.
– Ешқандай жарақат жоқ. Ойынға толық дайынбыз, – деді ол.
Бас бапкер жанкүйерлердің қолдауы командаға жігер беретінін айтты.
– Алматыдан ғана емес, басқа өңірлерден келетін жанкүйерлердің де бізді қолдайтыны қуантады. Олардың қолдауы бізге қосымша күш береді, – деді «Қайрат» бас бапкері.
Бұған дейін «Қайрат» Чемпиондар лигасында «Левскиге» есе жібергенін жазған едік.