ОРАЛ. ҚазАқпарат - «Ақжайық» өз алаңында Қазақстан кубогінің 1/8 финалында Алматының «Қайратын» қабылдады, деп хабарлайды ҚазАқпарат тілшісі.
Өткен жылы оралдық клуб өз тарихында алғаш рет ел кубогінің финалына дейін жеткен еді.
Алайда чемпионатта сәтсіз өнер көрсетіп, бірінші лигаға түсіп қалған-ды.
Биыл Алматыда кубок үшін өткен бірінші ойында «Қайрат» 2:1 есебімен жеңіске жеткен еді.
Оралдағы қарымта матчта алаң иелері есеп ашуға бар күшін салды.
Әсіресе, бәсеке соңына таман жиі шабуылдағанмен, ештеңе өзгермеді. Матч 0:0 есебімен тең аяқталды.
Осылайша, «Қайрат» ширек финалға жолдама алды.
«Ақжайық» енді премьер-лигаға қайта оралу үшін барын салатын болады.
Еске сала кетейік, бұдан бұрын бірінші лигада «Ақжайық» Астанада «Жеңістен» жеңіліп қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).