«2014 жылғы 30 мамырда Солтүстік Қазақстан облыстық ауруханасына жағдайы аса мүшкіл, басынан ауыр жарақат алған 40 жасар науқас жеткізілген.
Аурухана дәрігерлері науқастың өмірін сақтап қалу үшін қолдан келгеннің бәрін жасағанымен, 10 маусымда миы өлген. Туыстары марқұмның ішкі ағзаларын трансплантациялауға рұқсат берген соң реактивті ұшақпен 3 клиникадан транплантация бригадасы келіп жетті. Марқұмның жүрегі, екі бүйрегі, бауыры және ұйқы безі алынды.
Осы уақытта Астананың үш клиникасына ағзаларын транспланттауға мұқтаж үш науқас жатқызылып, дайындық шаралары жүргізілді. Ағзалар Астанаға жеткізіліп, бүйрегі 2 науқасқа, жүрегі 1 адамға және бауыры 1 науқасқа сәтті салынды. Ол науқастардың барлығы бірнеше мәрте стационарларда қолдау емін алған, өйткені өмірлерін құтқарудың жалғыз мүмкіндігі ағзаларын алмастыру болған.
Жүрек трансплантациясын Ұлттық ғылыми кардиохирургиялық орталықта атақты кардиохирург, Қазақстанның Еңбек Ері Ю.Пя жасады.
2 науқасқа бауыр мен бүйректі алмастыру отасын Ұлттық ғылыми медициналық орталықта 11 маусымда профессор Ж.Досқалиев атқарды.
Екінші бүйректі сол күні Республикалық жедел медициналық жәрдем ғылыми орталығында белгілі трансплантолог Ғ.Құттымұратов трансплантациялады.
Мәйіт донордан ағзаларды сәтті транспланттау шарасы Республикалық трансплантология бойынша үйлестіру орталығы, Солтүстік Қазақстан облыстық ауруханасы, Астананың жетекші клиникалары, Төтенше жағдайлар және Ішкі істер министрліктерінің өзара нақты үйлескен әрекеті арқасында іске асырылды», - деп жазылған хабарламада.
Айта кететін жайт, 2014 жылғы ақпан айынан бері ҚР Денсаулық сақтау министрлігі еліміздің 9 облыс орталығында Республикалық трансплантология бойынша үйлестіру орталығының өкілдіктерін ашты.
Өңірлік және стационарлық мамандар Қазақстанда трансплантация саласын үйлестіру бойынша оқыту тренингтерін өткізді. Өңірлік орталықтар қазіргі уақытта әлеуетті донорлардан ағзаларын алуға бағытталған әзірлік жұмыстарын бастап кетті.