Қазақ футболының абыройы Сейілді Байшақов - 60 жаста
Мерейлі кездесулердің қатысушыларының айтуынша, С. Байшақов - қазақ спортының қаһарманы. Жамбыл облысының түлегі өзінің 20 жылдық ғұмырын Алматылық «Қайрат» сапында өткізді. Орталық қорғаушы қызметін атқарушы Байшақов елдің жоғарғы лигасында енді өнер көрсете бастаған кезде-ақ өзінің жақсы ойын өрнегін таныта бастаған еді. Соның нәтижесінде, 1971 жылы одақ көлемінде ең үздік дебютант атанған болатын.
Әуелден балалар командаларының ойындары болса, онан соң ардагерлер құрамаларының және басты кейіпкердің достарының ойындары болды. Дәл осындай мерекелік шаралар қыркүйектің 2-сінде Астанадағы Қажымұқан Мұңайтпасов атындағы стадионда өткізілгелі отыр. өзінің 11 жылдық карьерасында тек үздік нәтижелер көрсеткен Байшақов 1977 жылы КСРО құрамасына шақырту алды. Ол құрамда 1978 жылғы әлем біріншілігінің іріктеу турларында Венгрия мен Грекияға қарсы ойындарда алаңға шықты. Оның шебер ойынының арқасында «Қайрат» командасы 1974-1981 жылдар аралығында ел біріншіліктерінде және одақ көлемінде талай жеңістерге жетті. Сонан бері «4» нөмірлі жейде әрқашан Сейілді Байшақов атты тасқамал қорғаушыны еске түсіріп тұрады.
С.Байшақов КСРО жоғарғы лигасында барлығы 225 матч өткізіп, 7 голдың авторы атанды. Барлығы «Қайрат» сапында. Сонымен бірге, 1-ші лигада 71 ойын өткізіп, 4 голдың иесі болды. Оның қатысуымен «Қайрат» командасы теміржолшылардың Халықаралық Спорт Кеңесінің Кубогін тарихта 1-ші одақ командасы ретінде жеңіп алды. Өзінің спорттық карьерасының соңына қарай көп жылдар бойы «Қайратты» жаттықтырып, кейіннен клубтың вице-президенті болды. Онан соң ҚР Футбол Қауымдастығына ауысты. Қазіргі күнге дейін қауымдастықта вице-президент қызметін абыройлы атқарып келеді.
ҚР-ның еңбек сіңірген жаттықтырушысын құттықтауға КСРО спорт шеберлері, достары мен 70-80 жылдардағы «Қайрат» сапында болған командаластары жиналды. Мерейлі жолдастық кездесулерде Құралбек Ордабаев, Диас Омаров, Асқар Қожабергенов, Евгений Кузнецов және басқалары болды.
Мерекелі шара қыркүйектің 2-сі күні Астанадағы Қажымұқан Мұңайтпасов атындағы стадионда жалғасады деп жоспарланған.