Қазақ халқын данышпан деп айтсақ, қателеспейміз – Қасым-Жомарт Тоқаев

АСТАНА. KAZINFORM – Мемлекет басшысы қазақ халқының данышпандығына қатысты түсінік берді.

- Көрнекті қаламгер Төлен Әбдіктің жыл басында «Егемен Қазақстан» газетіне берген сұхбатын атап өткім келеді. Жазушы «Атаның баласы болма, адамның баласы бол» деп, орынды пікірін айтты. Осы жерде айтарым: өз ұлтыңды өзгелерден биік қою түптің түбінде жарға жығады. Қазақ халқы өзгелерден кем емес, бұл – ақиқат, бірақ артық та емес деп айтуымыз керек. Қазақ халқын данышпан деп айтсақ, қателеспейміз, - деді Қасым-Жомарт Тоқаев ұлттық құрылтайда. 

Президент мәлімдегендей, дегенмен дүние жүзінде данышпан халықтар аз емес, ол – ақиқат. 

- Мұндай пікір кейбір адамға ұнамауы мүмкін. Алайда көпшіліктің көңілінен шығамын деп, тура сөзден жаңылуға болмайды. Шын мәнінде әр ел басқа жұрттан даму деңгейіне қарай озбақ. Жалпы біз төл тарихымызға көкжиегі кең, тамыры терең өркениеттік көзқараспен қарауымыз керек. Бұл – өте маңызды. Сонда ғана халқымыздың өткеніне, бүгіні мен болашағына мүлде жаңа көзқарас пайда болады, - дейді Мемлекет басшысы. 

Бұған дейін Мемлекет басшысы Қасым-Жомарт Тоқаев елімізде Абай институтын құрып, серіктес елдерде төл мәдениетімізді насихаттайтын орталыққа айналдыруды тапсырды.