Қазақ тілін өзінің кәсіптік деңгейінің дәрежесінде білуге тиіс мамандықтардың тізімі жасалмаса, бұл бағдарламадан ештеңе шықпайды - А.Смайыл
Бағдарламада нормативтік-құқықтық базаны жетілдіру жөнінде айтылғандығын тілге тиек еткен депутаттың сөзіне қарағанда, қолданыстағы еліміздің «Тіл туралы» заңына өзгерістер мен толықтырулар енгізу мәселесі 1998-2001 және 2001-2010 жылдарға арналған бағдарламаларда да жақсы айтылып, Елбасы қол қойған тұжырымдамада да өткір көтерілген. «Біз осы жылдардың ішінде қолданыстағы «Тіл туралы» заңның 23-ші бабын өзгертуге ұсыныс жасадық. Алайда бұған Мәдениет министрлігі де, Парламент депутаттары да кіріскенімен әлі күнге дейін толықтырулар мен өзгертулер енгізілген жоқ», деді.
Бұл қазақ тілін өзінің кәсіптік деңгейінің дәрежесінде білуге тиіс мамандықтарды айқындау екендігін айтқан халық қалаулысы «ол билет сататын кассирден бастап, елмен жиі араласатын қызметтерде отырған шенеуніктерге «айналайын қазақ тілін өзіңнің деңгейіңде білші» деген ғана талап. Сол әлі күнге дейін орындалмай, тізім жасалмады. Нақ осының кесірінен қазақ тілі біздің қоғамға, өмірімізге енген жоқ. Егер сол тізім жасалмайтын болса, мына бағдарламадан ештеңе шықпайды. Біз сол заңды қашан өзгертеміз, қашан толықтырамыз? Ең керегі осы болатын және бұл заңдарды түзейтін бағдарлама болуы керек», деді.
А.Смайылдың пайымынша, 23-ші бапты өзгертетін болсақ, соған сәйкес бірқатар заңдар бір мезетте автоматты өзгеруі керек. Сонымен қатар 1 жылдың ішінде заңдарды түзеп, қалған 9 жылда соған орай бағдарламадағы талаптарды, міндеттерді жүзеге асыруымыз қажет. Ал Үкімет 2011 жылы Парламентке түзетілуі тиіс заңдарды түгел әкелуі тиіс. «Мына бағдрламада солай жазылуы керек еді және нормативтік-құқықтық база деген жалпылама сөз емес тіл жөніндегі заңның осындай баптарын, тағы да басқа заңдардың атын атап, түсін түстеп тұрып көрсетуі керек еді», деп түйіндеді сөзін Мәжіліс депутаты.