Қазақстан ауыл шаруашылығы өнімі экспортын 10 млрд долларға жеткізбек
АСТАНА. KAZINFORM – Елордада «Kazagro/Kazfarm-2024» халықаралық ауыл шаруашылығы көрмелері жұмысын бастады. Үш күнге созылатын іс-шараға әлемнің 21 елінен келген үздік 250 агроөнеркәсіп кешені компаниясы қатысуда.
«Қазақстан сияқты мемлекеттер үшін агроөнеркәсіп кешені ауылдың тағдыры деп айтсақ артық емес. Сондықтан ауылдың, сол ауылда тұратын азаматтардың болашағы бүгінде осындай жаңа технологиялармен байланысты. Бұл көрмелердің әріптесі саналатын Германия 40 компаниясын әкеліп отыр. Соған орай көрме жай ғана технологияларды ұсыну алаңы емес, мемлекетаралық қарым-қатынас тірегіне айналып отыр», - деді халықаралық іс-шараның ашылуына сөз алған Премьер-Министрдің кеңесшісі Ералы Тоғжанов.
Мәжіліс депутаты, «Ауыл» партиясының төрағасы Серік Егізбаев бүгінгі көрмелерде тек қана тек қана агротехнологиялар ғана емес, сонымен қатар еліміздің бүкіл ауыл халқына қажетті әрі пайдалы жобалар ұсынылып отырғандығын баса айтты.
«Мәжілістің аграрлық комитеті бұл іс-шараға жан-жақты қолдау көрсететін болады. Бұл көрме біздің ұлттық аграрлық брендіміз болуын қалаймыз», - деді ол.
Ауыл шаруашылығы вице-министрі Аманғали Бердалин мұндай көрме еліміздің ауыл шаруашылығын дамытуға үлкен ықпалын тигізетіндігін атап өтті.
«Қазақстан Орталық Азияда ауыл шаруашылығы саласының көшбасшысы саналады. Бүгінгі таңда еліміз 20 млрд доллардың ауыл шаруашылығы өнімін өндіреді. Қайта өңдеу саласы 6 млрд долларды құрайды. Республиканы азық-түлікпен толық қамтамасыз етіп отырмыз. Мұның бәрі ауыл шаруашылығының дамып келе жатқанын көрсетеді. Соңғы 5 жылда ауыл шарушылығына тартылатын инвестиция көлемі 2,2 есе артып, 2,2 млрд долларға жетті. Экспорт көлемі 5 млрд долларға жетті. Алдағы 1-2 жылда экспорт көлемін 10 млрд долларға жеткізуді жоспарлап отырмыз», - деді вице-министр.
Дәстүрлі түрде көрмелер ауыл шаруашылығы саласының екі негізгі бағыты бойынша өтіп жатыр. KazAgro өсімдік шаруашылығы бөлімінде аграршыларға әлемдегі ең озық және жоғары сапалы техниканың түрлерін ұсынады. Көрме тұқым таңдаудан бастап өңдеу технологиясына дейінгі бүкіл өндіріс процесін қамтиды.
KazFarm - бұл мал шаруашылығына арналған, түрлі технологияларды тамаша көрсететін жарқын және қызықты экспозиция. Мұнда табысты мал өсірушілер бордақылау алаңдары мен сүт-тауар фермаларына арналған өнімдердің толық циклімен таныса алады.