АСТАНА. KAZINFORM — Теннистен Billie Jean King Cup әлемдік командалық рейтингісі жаңартылды.
Қазақстан әйелдер құрамасы 12-ден бірден 6-орынға көтерілді.
Осылайша, Қазақстан әйелдер құрамасы теннис тарихында алғаш рет үздік алтылыққа енді.
Қазақстандықтар Чехия, Германия, Аустралия, Жапония, Бельгия, Франция командаларын артқа қалдырды.
Өткен жылғы әлем чемпионы Италия көш бастаса, Ұлыбритания екінші, АҚШ үшінші сатыда тұр. Испания төртінші, Канада бесінші орынға табан тіреді.
Өткен айда Қазақстан әйелдер құрамасы іріктеу турнирінде табысты өнер көрсетіп, өз тарихында үшінші рет командалық әлем чемпионатының финалдық кезеңіне жолдама алған еді.
Әлемнің үздік сегіз командасы бас қосатын финалдық дода 16-21 қыркүйекте Қытайдың Шэньчжэнь қаласында өтеді.
Еске сала кетейік, бұдан бұрын Жібек Құламбаеваның Германиядағы жарысты камбэкпен финалға өткенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).