Қазақстан, Әзербайжан және Грузия арасында бірыңғай теміржол әкімшілігі құрылады
АСТАНА. KAZINFORM — Аталған үш ел арқылы өтетін жүк тасымалы «бір терезе» қағидатымен жұмыс істейді. Бұл туралы Көлік вице-министрі Мақсат Қалиақпаров мәлім етті.
— Қазақстан, Әзербайжан және Грузияның көлік министрліктері деңгейінде транскаспий халықаралық көлік бағытын дамыту аясында жұмыс тобы құрылды. Қазір үш елдің көлік қатынасын интеграциялау бағытында ауқымды жұмыс атқарылып жатыр. Үш елдің арасында «бір терезе» қағидатымен жұмыс істейтін теміржол әкімшілігі құрылады. Демек Қазақстан, Әзербайжан және Грузия арқылы өтетін жүкті бір оператор, бірыңғай төлем арқылы тасымалдауға болады, — деді Мақсат Қалиақпаров БАҚ өкілдерінің сауалына жауап бере тұрып.
Оның айтуынша, теміржол әкімшілігі, яғни үш елдің бірлесіп құрған кәсіпорын Астана халықаралық қаржы орталығында тіркелген.
— Елордада орналасқан халықаралық қаржы орталығы үш ел үшін барлық қызметті «бір терезе» қағидатымен ұсынады, — деп толықтырды вице-министр.
Бұған дейін Қазақстанда тағы екі әуежайдың сенімгерлік басқаруға берілетінін хабарлаған едік.
Айта кетейік, бүгін елордада «Көлік және логистика нарығы» тақырыбында VI халықаралық конференциясы және GLOBAL Avia DAY әуе тасымалдарын дамыту жөніндегі I халықаралық форумы өтіп жатыр.