«Қазіргі кезде турнирді республикадағы ең үлкен ұлттық арна «Қазақстан» мен «KAZSport» трансляциялайды. Былтырғы рейтингке сүйеніп айтатын болсам, тек Қазақстанда 5-6 млн. көрермен тамашалады. Менің ойымша, алты сағатқа созылатын трансляция үшін бұл өте жақсы көрсеткіш», - деді А.Шораев.
Оның айтуынша, 37 елге тарайтын «Боец» телеарнасының арқасында турнирді әлем бойынша тағы 250 млн. адам тамашалауға мүмкіндік алмақ.
Бұдан бөлек, айтулы доданы көрсетуге бірнеше арналары, сондай-ақ Интернет телеарналар қосылады деп күтілуде.
«Сондықтан да біздің турнирді барша әлем бойынша жарты миллиардтан астам көрермен тамашалайды», - Шораев.
Осымен бесінші мәрте жалауы желбірейтін биылғы «Қазақстан Барысы» турнирінің іріктеу сындары еліміздің барлық аймағында мәресіне жетіп, жүзден жүйрік атанған ең мықты 33 балуан шілденің 4-і күні Астанада өзара белдеседі.
Аталған турнир аясындағы іріктеу төрт кезеңде өтті. Бірінші кезеңдегі іріктеулер ағымдағы жылдың сәуір бойы ауылдар мен елді мекендерде, ІІ кезең - аудандық, қалалық іріктеулер 1-15 мамыр аралығында, III кезең - облыстық іріктеулер 20 мамырға дейін болды, сондай-ақ соңғы кезең - ақтық сын. Оған қатысатын балуандар арасында 19-23 мамыр аралығында Алматы қаласында оқу-жаттығу жиыны өткізілді.