Қазақстан Елшісі Андорраның тең Князіне сенім грамоталарын табыс етті
22:46, 26 Мамыр 2015
АСТАНА. ҚазАқпарат - 22 мамыр күні Қазақстан Республикасының Испаниядағы Төтенше және Өкілетті Елшісі және Андорра Князьдігіндегі Төтенше және Өкілетті Елшісі қызметін қоса атқарушы Бақыт Дүйсенбаев Андорраның тең Князі Жоан Энрик Вивес-и-Сисильяға сенім грамоталарын табыс етті, деп хабарлады ҚР СІМ баспасөз қызметінен.
Кездесу барысында тараптар екіжақты қатынастардың келешегін талқылап, халықаралық және аймақтық мәселелер бойынша пікір алмасты. Сонымен бірге, сапар аясында Андорра Сыртқы істер министрі Жильбер Сабойя Суньемен кездесу өтті. Кездесу барысында екіжақты ынтымақтастық мәселелері, сондай-ақ туризм, банк саласы және Қазақстанның БҰҰ ҚК-не кандидатурасын қолдау мәселелері талқыланды.