НҰР-СҰЛТАН. ҚазАқпарат – Футболдан Қазақстан чемпионатының 14-турында «Тұран» Түркістанда Оралдың «Ақжайығын» қабылдады, деп хабарлайды ҚазАқпарат тілшісі.
Қос команда да бірінші лигаға түсіп қалатын қауіпті аймақта тұрғандықтан, ұпай ауадай қажет еді.
Өткен жылғы біріншілікте «Ақжайық» Түркістанда 2:0 есебімен жеңіске жетіп, Оралда 1:1 есебімен тең ойнаған еді.
Бұл жолы бірінші таймның 25-минутында «Ақжайық» сапындағы бразилиялық Рафаэль Сабиноның басына тиген доп ресейлік Степан Сикач қорғаған қақпаға кіріп кетті.
Екінші кезеңде 52-минутта оралдықтар ұйымдастырған шабуылдан кейін команда капитаны, ресейлік Сергей Шустиков допты тоқтатпастан дәл тебе білді – 1:1.
Бұдан кейін есеп өзгерген жоқ. 12 ұпайдан жинаған «Тұран» мен «Ақжайық» 12-інші және 13-орындарда қалды.
Бұл турда «Ақсуды» 5:0 есебімен ойсырата ұтқан «Астана» командасы 24 ұпаймен турнир кестесінде көш бастады.
Келесі турда батысқазақстандық клуб 25 маусымда өз алаңында «Ордабасыны» (Шымкент) қабылдаса, бір күннен кейін түркістандықтар Ақтауда «Каспиймен» кездеседі.
Еске сала кетейік, бұдан бұрын «Қайраттың» «Мақтааралдан» басым түскенін жазған болатынбыз.
Суреттерді түсірген Айбатыр Нұраш.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).