Қазақстан Google Cloud жаһандық желісіндегі өңірлік хабқа айналады
АСТАНА. KAZINFORM — Akashi деректер орталығы Google Cloud инфрақұрылымын орналастыру алаңына айналады. Бұл — Қазақстанның цифрлық трансформациясы жолындағы маңызды кезең. Kazinform агенттігінің тілшісіне берген сұхбатында Бас директор Владислав Минкевич бұл ынтымақтастық цифрлық сервистердің жылдамдығы мен сенімділігін арттыратынын, сондай ақ Қазақстанға бұлтты технологиялар саласында өңірде жетекші орын алуға мүмкіндік беретінін атап өтті.
— Google сияқты серіктесті тарту үшін қандай техникалық және ұйымдастырушылық критерийлерді орындау керек болды?
— Бұл үшін Akashi ең қатаң халықаралық стандарттарға сай болуы тиіс еді. Бастапқыда деректер орталығын әлемдегі ең сенімді саналатын Tier IV санаты бойынша жобаладық. Мұндай инфрақұрылым барлық жүйелердің толық резервтелуін қамтамасыз етеді: электр қуаты өшкен, жабдық бұзылған немесе апат болған жағдайда да жұмыс тоқтамайды. Біз 2026 жылдың бірінші тоқсанында іске қосатын алғашқы модуль мыңдаған тіректерге және тәуелсіз қуат көздеріне арналған. Бұдан бөлек, кешенді қауіпсіздік жүйесі құрылды: көпдеңгейлі физикалық бақылау, электронды қолжетімділік, тәулік бойы мониторинг және ашық қолдану рәсімдері. Логистика да маңызды рөл атқарды. Сайтқа ыңғайлы қолжетімділік және қолдау процестерінің жолға қойылуы бізге Google-дың жаһандық серіктестеріне қоятын талаптарына сай болуға мүмкіндік берді.
— Google Cloud жаһандық экожүйесіне толығымен кірігу мүмкіндік бар ма, әлде қызметтер жергілікті жерде ғана жүзеге аса ма?
— Google Cloud қолданатын модель — «таратылған бұлт» деп аталады. Бұл архитектурада қызметтердің бір бөлігі жергілікті жерде атқарылады. Бұл кідірістердің аз болуын қамтамасыз етіп, елдің ішкі деректерді сақтау талаптарына жауап береді. Бұл ретте Қазақстандағы түйін Google-дың бірыңғай жаһандық жүйесінің бөлігі болып қала береді: пайдаланушылар экожүйенің барлық мүмкіндіктеріне және жаһандық басқару тетігіне қол жеткізеді. Осылайша, Қазақстан бір мезгілде әрі локализацияға, әрі әлемдік бұлтты қызметтермен толыққанды интеграцияға ие болады.
— Google Cloud платформасының жергілікті түйіні іске қосылғаннан кейін қазақстандық компаниялар қандай артықшылықтарға ие болады?
— Бизнес үшін жергілікті түйіннің іске қосылуы, ең алдымен жылдамдық пен сенімділікті білдіреді. Компаниялардың ішкі деректерді өңдей алуы барлық реттеуші талаптарды орындауды жеңілдетеді. Қызметтердің жауап беру уақыты айтарлықтай қысқарады, бұл әсіресе қаржы ұйымдары, телеком саласы, медиа және ауқымды деректермен жұмыс істейтіндер үшін маңызды. Жергілікті қолдау және байланыс арналары бұлтты қызметтерді тезірек қосуға және шетелдік кеңселердің көмегінсіз туындаған мәселелерді шешуге мүмкіндік береді.
— Деректер беру кідірісі (latency) қаншалықты азаяды және бұл қай салаларда ерекше маңызды?
— Деректер қашықтағы өңірлерде, мысалы Еуропада өңделген кезде, кідіріс ондаған миллисекунд алуы мүмкін. Бір қарағанда аз көрінеді, бірақ онлайн-банкинг, трейдинг жүйелері, бейнеағын немесе көп қолданбалы ойындар үшін мұндай кідірістер аса маңызды. Қазақстанда түйіннің орналасуы кідірістерді бірнеше есеге қысқартуға мүмкіндік береді. Бұл дегеніміз — транзакциялар жылдамырақ өтеді, бейнеқоңыраулар анағұрлым тұрақты болады, бейнеағын ұзақ буферлеусіз көрсетіледі, ал өндірістік IoT-жүйелер іс жүзінде нақты уақыт режимінде жұмыс істей алады деген сөз.
— Қазақстандық пайдаланушылардың деректері ел аумағынан тыс шығып кетпейтіндігіне кепілдік беруге бола ма?
— Біз деректерді тек қана Қазақстан Республикасының аумағында сақтау және өңдеуді қамтамасыз ететін шешімдерді ұсынуға дайынбыз. Ол үшін тиісті инфрақұрылым, энергетикалық қуат және қолжетімділікті бақылау хаттамалары қарастырылған. Соңғы шешім Google Cloud саясатына және нақты қызметтердің архитектурасына байланысты болады, алайда біздің тарапымыздан деректерді локализациялау мүмкіндігі мен заң талаптарына сәйкестігін қамтамасыз ететін барлық жағдай жасалды.
— Жоба іске қосылғаннан кейін Google Cloud-тың қандай жаңа қызметтері мен сервистерін пайдалана аламыз?
— Астанада түйіннің енгізілуі Google Cloud-тың бірқатар қызметтерін жеделдетеді. Бұл корпоративтік қосымшаларға, аналитика мен жасанды интеллект құралдарына, сондай-ақ стриминг пен медиа-сервистерді жылдамырақ әрі тұрақты ететін контент үшін жергілікті кэштерге қатысты. Сонымен қатар, жергілікті жерде орындалуды және кідірісті азайтуды талап ететін бұлтты функциялар да пайда болады.
Бұған дейін Google Лондон маңындағы жаңа деректер орталығына және AI әзірлемелеріне 5 миллиард фунт салатыны хабарланған болатын.
Камила Мүлік