Қазақстан - қант диабетімен ауыратын науқастарға инсулин помпаларын тегін беретін әлемдегі жалғыз мемлекет - ҚР ДСМ

АСТАНА. 30 қаңтар. ҚазАқпарат - Қазақстан Республикасының Денсаулық сақтау министрлігінің Жауапты хатшысы С.Мусиновтың «Медтроник» (АҚШ) компаниясының өкілдері: диабетология саласындағы клиникалық зерттеулер жөніндегі вице-президенті Фраун Кауфманмен және клиникалық зерттеулер жөніндегі бас маманы Л. Едигаровамен кездесуі болып өтті.

Бұл туралы ҚР Денсаулық сақтау министрлігінің баспасөз қызметінен хабарлады.

Қазақстан 2012 жылдың басынан бері маңызды қадамға барып, 1 типті қант диабетіне шалдыққан 5-15 жас аралығындағы балаларға осы аталған компания өндірген инсулин помпаларын мемлекет қаражаты есебінен сатып ала бастады.

Жобаның негізгі мақсаты - мүгедектікке апарып соғатын және науқастардың өмірін елеулі түрде қиындататын асқынулардың дамуын төмендету. Бұл шараның тағы бір маңыздылығы, Қазақстан - қант диабетімен ауыратын науқастарға инсулин помпаларын тегін беретін әлемдегі жалғыз мемлекет.

Кездесу барысында жобаны жүзеге асыру мәселелері талқыланды. Қазіргі уақытта инсулин помпалары қант диабетіне шалдыққан 5-15 жас аралығындағы 607 балаға орнатылды. Жоба аясында осы инсулин помпаларымен жұмыс істейтін 90 эндокринолог-дәрігер оқытылды.

Жобаның тиімділігін бағалау үшін арнаулы индикаторлар әзірленді. 2012 жылдың нәтижесінде балалардың қант диабетіне сырқаттанушылық саласында оң өзгерістер (кетоацидоз және ауыр гипогликемия оқиғалары азайды, науқастардың өмір сапасы жақсарды) байқалды.

Жобаны жүзеге асыру жалғасады.