Қазақстан кезекті ғарышкерін қашан ұшырады – министр жауабы

АСТАНА. KAZINFORM – Цифрлық даму, инновациялар және аэроғарыш өнеркәсібі министрі Жаслан Мәдиев отандық ғарышкерлерді даярлау, қазақстандық ғарышкерлерді әуе сапарына жіберуге қатысты пікірін білдірді.  

«Қазір ғарыш саласы бойынша 6-шы ғылыми бағдарлама әзірленіп жатыр. Ғарышкерді ұшыруға айтарлықтай инвестиция қажет және мұндай мүмкіндікті қолайлы бағамен пайдалану үшін әртүрлі келіссөз жүргізілуде. Дәл қазір бізде ұшыратын дайын ғарышкер жоқ. Бірақ, халықаралық компаниялармен және шет елдермен бұл мәселені талқылап жатырмыз», - деп жауап берді Жаслан Мәдиев Үкімет отырысынан кейін өткен баспасөз мәслихатында.

Еске сала кетсек, биыл сәуірде космосқа тағы бір қазақ ғарышкерін жіберудің шарттары пысықталып жатқаны туралы хабарлаған едік. 

Сондай-ақ ҚР ұшқыш-ғарышкері, Халық қаһарманы Айдын Айымбетов агенттік тілшісіне берген сұхбатында келесі қазақ ғарышкері қашан шығуы мүмкін екенін айтты. 

Айта кетейік, биыл алғаш рет әуесқой ғарышкерлер ғарышқа ұшты.