Қазақстан-Қытай шекарасындағы автокөлік өткізу пункттері уақытша жабылады

АСТАНА. KAZINFORM — Қазақстан Республикасы Мемлекеттік кірістер комитеті Қазақстан мен Қытай шекарасындағы өткізу пункттерінің жұмысы уақытша тоқтатылатынын хабарлады.

— Қытай Халық Республикасының Құрылған күні (2025 жылғы 1-3 қазан) және Күзгі мейрам (2025 жылғы 6 қазан) мерекелеріне байланысты Қазақстан-Қытай шекарасындағы автокөлік өткізу пункттері уақытша жұмысын тоқтатады. Осы күндері жеке тұлғаларға, көлік құралдары мен жүк тасымалдарына өткізу жүргізілмейді, — деп мәлім етті комитеттегілер.

Сонымен қатар, теміржол өткізу пункттері қалыпты режимде жұмысын жалғастырып, көлік-логистика байланысының тұрақтылығын қамтамасыз етеді.

Айта кетейік, 2025 жылғы 17 қыркүйекте Қаржы министрі автомобиль көлігімен Мемлекеттік шекарасын кесіп өту, сондай-ақ жүк пен тауарларды тасымалдау ережелеріне өзгерістер енгізу туралы бұйрыққа қол қойды. Жаңа өзгерістерге сәйкес, жергілікті атқарушы органдар енді шекаралық өткізу пункттерінің жанынан күту аймақтарын ұйымдастыруы тиіс.