Сот материалдарына сәйкес, өткен жылы К. есімді азамат сәуір мен қазан айлары аралығында өз үйінде заңсыз алкоголь өнімдерін жасады. Ал коньяк үшін «Қазақстан»-ның қолданылған шөлмектерін пайдаланды. Одан кейін тығындармен бітеп, жалған есептік-бақылау маркаларын жапсырған. Сосын барлық заңсыз алкоголь өнімдерін қаладағы дүкендерге таратып отырды. Сот отырысында тәртіп бұзушы ер адам өз кінәсін мойындамады.
«Тараз қаласының №2 сотының шешімі бойынша К. есімді азамат Қылмыстық кодекстің 233-бабы, 2-тармағы бойынша (акцизделетiн тауарларды акциздiк маркалармен және (немесе) есепке алу-бақылау маркаларымен таңбалаудың тәртiбi мен қағидаларын бұзу, акциздiк маркаларды және (немесе) есепке алу-бақылау маркаларын қолдан жасау және пайдаланғаны үшін) кінәлі деп танылды. Оған қатысты 1 жыл 6 айға бас бостандығын шектеу жазасы қолданылды. Бұдан бөлек, ол 62 592 теңге көлемінде мемлекеттік баж салығын төлеуі тиіс. Сот шешімі заңды күшіне енген жоқ», - делінген соттың ресми хабарламасында.