ОРАЛ. ҚазАқпарат - Футболдан Қазақстан кубогы үшін ойында «Ақжайық» өз алаңында Ақтаудың «Каспийін» қабылдады, деп хабарлайды ҚазАқпарат тілшісі.
Бұл украиналық маман Владимир Мазярдың орнына келген молдовалық Игорь Пикущактың бас бапкер ретіндегі алғашқы матчы еді.
Бірінші таймда қонақтар сапынан Павел Киреенко 39-минутта есеп ашты.
Екінші таймда И.Пикущак тыңнан грузиялық шабуылшы Тома Табатадзе мен украиналық жартылай қорғаушы Илья Коваленконы қосты. Бұл тактика өз жемісін берді. Т.Табатадзе 49-ыншы және 58-минутта қос голдың авторы атанды. Іле-шала И.Коваленко 60-минутта есепті 3:1-ге жеткізді.
Осылайша, көптен жеңіс дәмін татпаған «Ақжайық» үш ұпайға ие болып, өз тобында екінші орынға көтерілді. Қазақстан кубогы үшін келесі турда 23 шілдеде «Ақжайық» «Қызылжарды», «Каспий» «Қайсарды» қабылдайды.
Еске сала кетейік, бұдан бұрын «Ақжайық» футбол клубының бас бапкері тағайындалғанын жазған болатынбыз.
Суреттерді түсірген Айбатыр Нұраш
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).