ОРАЛ. ҚазАқпарат - Қазақстан кубогы үшін ойында «Ақжайық» өз алаңында «Қызылжар» командасын қабылдады, деп хабарлайды ҚазАқпарат тілшісі.
Бұл кездесуде бірінші таймда есеп ашылған жоқ.
Ойынның екінші кезеңінде «Ақжайық» сапындағы грузиялық шабуылшы Тома Табатадзе 51-минутта мергендік танытты. Бұл оның оралдықтар құрамына қосылғаннан кейінгі үшінші голы еді. Т.Табатадзе «Каспиймен» өткен кубоктық матчта қос голдың авторы атанған болатын.
Конференция лигасында өнер көрсететін «Қызылжар» қанша шабуылдап баққанымен, есеп өзгерген жоқ. 1:0, «Ақжайық» пайдасында.
Осылайша, молдовалық маман Игорь Пикущактың шәкірттері Қазақстан кубогы ойындарында қатарынан екінші жеңісіне қол жеткізіп, өз тобында 6 ұпаймен екінші орында келеді. Бұл топта 9 ұпаймен Қызылорданың «Қайсары» көш бастап тұр.
Еске сала кетейік, бұдан бұрын Қазақстан кубогы үшін ойында «Ақжайықтың» «Каспийді» ұтқанын жазған болатынбыз.
Суреттерді түсірген Айбатыр Нұраш.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).