АСТАНА. KAZINFORM – Астана қаласында алғаш рет 21 жасқа дейінгі есту қабілеті зақымданған спортшылар арасында сурдо футзалдан әлем чемпионаты мәресіне жетті.
Жарысқа барлығы 10 команда қатысып, финалда Қазақстан мен Иран құрамалары алтын жүлдені сарапқа салды.
Аса тартысты өткен ойында қазақстандықтар 1:3 есебімен жеңіліп жатып, санаулы секундтар қалғанда таразы басын теңестіріп кетті.
Содан кейін экстра таймда 4:3 есебімен алға шықты. Алайда осы басымдықты ұстап тұра алмады – 4:7.
Осылайша ирандықтар үздік шықса, Қазақстан күміс медальмен марапатталды.
Бразилия құрамасы үздік үштікті түйіндеді.
2022 жылы Куала-Лумпурда (Малайзияда) алғашқы әлем біріншілігінде Қазақстан құрамасы финалға дейін жетіп, онда да Иранға 0:1 есебімен есе жіберген еді.
Еске сала кетейік, бұдан бұрын ҚФФ-ның Лео Игитаның әрекетіне байланысты мәлімдеме жасаған болатын.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).