АСТАНА. KAZINFORM — Теннистен Қазақстан құрамасы Сиднейде United Cup турнирінің жартылай финалында Польшамен кездесті.
Кортқа бірінші болып дүниежүзілік рейтингіде 78-орында тұрған Александр Шевченко мен әлемнің 16-ракеткасы Хуберт Хуркач шықты.
Поляк теннисшісі бір сағатқа жетпейтін уақыт ішінде 6:3, 6:2 есебімен ұтты.
Бұдан кейін рейтингіде 6-сатыдағы Елена Рыбакина мен әлемнің 2-ракеткасы Ига Швентекке кезек келді.
Екі сағаттан астам уақытқа созылған тартысты матчта Швентек басымдылық танытты — 7:6 (7:5), 6:4.
Осылайша, 2:0 есебімен алға шыққан Польша екінші рет қатарынан финалға жолдама алды.
Олар өткен жылы финалда Германияға есе жіберген еді.
Биыл Германияны ұтқан Қазақстан алғаш рет жартылай финалға шыққан еді.
Еске сала кетейік, бұдан бұрын United Cup турнирінде Қазақстанның жартылай финалдағы қарсыласы анықталғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).