АСТАНА. KAZINFORM — Үндістанның Ахмедабад қаласында волейболдан ерлер командалары арасында өтіп жатқан Азия кубогында Қазақстан құрамасы бесінші орынға ие болды.
Қазақстандықтар бесінші орын үшін ойында Таиланд командасымен шеберлік байқасты.
Бірінші партия текетіреспен өтіп, есеп 17:17 болғаннан кейін қазақстандықтар таразы басын өздеріне аудара білді – 25:21.
Екінші сетте бастапқыда таилықтар алға кеткенімен, Сергей Трикоздың шәкірттері есесін жіберген жоқ – 25:23.
Үшінші партия Таиландтың еншісіне жазылды – 25:22. Дегенмен Қазақстан матчты жеңіспен аяқтай білді – 27:25. Қорытынды есеп – 3:1.
Осылайша, негізінен жастардан жасақталған Қазақстан командасы Азия кубогында үздік бес құраманың қатарына кірді.
Еске сала кетейік, бұдан бұрын волейболдан Азия кубогында Қазақстан топтық бәсекені жеңіспен түйіндегенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).