Қазақстан мен Әзербайжан 2-3 жылда сауда айналымын өсіруге ниетті
«Ең алдымен, сіздің еліңізге көптен күткен сапарды жасауға шақырғаныңыз үшін үлкен алғысымды білдіремін. Біз әзербайжандық бауырларымыздың тарапынан жылылық, қонақжайлылық сезінудеміз. Қол қойылатын бес мемлекетаралық құжат, сондай-ақ ведомствоаралық келісімдер әзірленді. Олар соңғы жылдардағы біздің қатынасымыздың жаңа кезеңі болып табылады, екі ел арасындағы экономикалық, қаржылық ынтымақтастық мәлелерін шешеді. Біз шын мәнінде барлық мәселелерді, соның ішінде қол қоюға дайындалған деклорацияны талқыладық. Біз алдағы екі-үш жылда сауда айналымын бірнеше есеге жоғарылатуға мүмкіндіктің бар екендігін анықтадық», - деп атап өтті Нұрсұлтан Назарбаев.
Президент, сондай-ақ, мәдениет саласындағы қарым-қатынасты нығайтудың қажеттілігін атап өтті.
«Бізге жастарды мемлекетіміздегі тиісті білім ордаларына қабылдау үшін, мәдени қатынасты, зиялы қауым өкілдерінің кездесуін, мәдени күндерді жаңғырту үшін мәдени-гуманитарлық шараларды басты назарға алуымыз керек(...) Жақсы мүмкіндік бар - ол «көпір» - 130 мың этникалық әзербайжандықтар, Қазақстанда тұрып жатқан азаматтарымыз. Біздің саудамыздағы жақсы көпір болып табылады. Мен олардың біріккен кәсіпорындар ашып, кәсіпкерлікпен айналысып жатқандығын және біздің қатынасымызды жақсартуға атсалысып жатқандығын білемін», - деді Қазақстан Президенті.
Кеңейтілген кездесу барысында Әзербайжан президенті Қазақстанды БҰҰ Қауіпсіздік кеңесіне ҚР-ның сайланғандығымен құттықтады.
«Бұл әлемдік істердегі Қазақстан рөлінің мойындалғандығын білдіріп, Сіздің жеке абыройыңыз бен тек біздің аумақта емес, сондай-ақ жер шарындағы бейбітшілікті нығайту үшін көтеріп жүрген бастамаларыңыздың арқасы деп білемін», - деді Ильхам Әлиев.
«Біздің қарым-қатынасымыздың дамып жатқандығына дән ризамын, әрдайым байланысып отырмыз. Бүгін көптеген мәселелер төңірегінде пікір алмастық. Осы пікір алмасу көрсеткендей, барлық мәселелер бойынша ұстанымдарымыз толықтай сәйкес келуде. Саяси ынтымақтастығымыз белсенді, экономика, көлік саласындағы болашағымыз жарқын. Біз бұны кеңінен талқыладық және қазір делегация құрамымен дискуссияны жалғастырамыз», - деді Әзербайжан басшысы.
«Бүгін қысқа мерзімде қабылданатын шешіміміздің сауда айналымын айтарлықтай ұлғайтуға, сондай-ақ өңірлік ынтымақтастық саласында жаңа жағдай құруға септігін тигізетініне сенімдімін. Қазақстан да, Әзербайжан да нақты жобалар мен транспорттық, энергетикалық салалар арқылы өңірлік ынтымақтастықты нығайтуға бар күш-жігерін жұмсауда. Сонымен қатар, екі елдің компаниялары арасындағы өзара инвестициялық қатынастардың басталып, жақсы нәтиже беріп жатқандығы мені қуантты. Сіздің сапарыңыз мен қабылданатын шешімдер инвестиция көлемін арттыру арқылы жеке секторды да ынталандырады деп үміттенемін», - деп атап өтті Ильхам Әлиев.