Қазақстан мен Грузия жоғары деңгейдегі байланыстарды жандандыруға келісті

АСТАНА. KAZINFORM — Мемлекет басшысы Грузия Премьер-министрі Ираклий Кобахидземен телефон арқылы сөйлесті, деп хабарлайды Ақорданың баспасөз қызметі.

Грузия тарапының бастамасымен болған әңгімелесу барысында өзара қарым-қатынастың қазіргі жай-күйі мен даму перспективасы талқыланды.

— Қасым-Жомарт Тоқаев пен Ираклий Кобахидзе екіжақты және көпжақты күн тәртібіндегі көптеген мәселе бойынша ынтымақтастықты нығайтуға бейіл екенін растады. Көлік-транзит, энергетика және туризм секілді бағыттарға басымдық бере отырып, сауда-экономикалық және инвестициялық ықпалдастықты кеңейтудің жай-жапсарына айрықша назар аударылды. Қасым-Жомарт Тоқаев пен Ираклий Кобахидзе халықаралық және өңірлік күн тәртібіндегі өзекті мәселелер жөнінде пікір алмасты. Тараптар жоғары деңгейдегі байланыстарды жандандыруға келісті, — делінген хабарламада.

Осыдан бұрын Президент Жапония Императорының туған күніне орай құттықтау жеделхатын жолдағанын жазған едік.