Қазақстан мен Венгрия ынтымақтастығының әлеуеті зор - Елбасы
Бүгін Ақордада Елбасы Нұрсұлтан Назарбаев бірқатар елдің елшілерінен сенім грамоталарын қабылдау кезінде осылай мәлім етті.
«Қазақстан мен Венгрияны халықтарымыздың ортақ тарихы мен мәдениеті байланыстырады. Екі ел де саяси-экономикалық және мәдени-гуманитарлық байланыстарды стратегиялық серіктестік аясында дамытуға ықыласты. Венгрия Премьер-министрі Виктор Орбанның биылғы сапарының қорытындысын да жоғары бағалаймыз. Келіссөздер Қазақстан-Венгрия ынтымақтастығының әлеуеті зор екенін көрсетті»,-деді Президент.
Өз кезегінде сенім грамоталарын тапсыру рәсімінен кейін Венгрияның Төтенше және Өкілетті Елшісі Андраш Барани екі елдің қарым-қатынастары стратегиялық серіктестік деңгейіне шыққандығын атап өтті.
«Менің Қазақстандағы жұмысым кезінде Астанада маңызды «ЭКСПО-2017» көрмесі өткелі тұр. Біздің ел осы айтулы шараға қатысатындығын растады. Сондықтан бұл бағытта тығыз қарым-қатынаста жұмыс істейміз»,-деді ол.