АСТАНА. KAZINFORM — 2022 жылғы Уимблдон және биылғы қорытынды турнирдің жеңімпазы, әлемнің 5-ракеткасы Елена Рыбакина жанкүйерлеріне сөз арнады.
Қазақстандық теннисші Instagram әлеуметтік желісіндегі парақшасында 2025 жылдың қорытындысымен үндеу жариялады.
- Қымбатты достар, менің сүйікті жанкүйерлерім! Сіздердің әрқайсыңызға мықты қолдауларыңыз – мінбеде, экранда, жіберген хабарламада және матчтан кейінгі жылы сөздеріңіз үшін алғыс айтамын.
Мен Қазақстан намысын қорғап, сіздерге жақсы көңіл-күй мен жеңістер сыйлап жүргенімді мақтан тұтамын. Әсіресе, қолына қалақша ұстаған балалардың көбейгенін көргенде, ерекше қуанамын. Егер менің ойыным сіздерді армандауға, еңбек етіп, өздеріңізге сенуге жетелесе, сол – мен үшін ең үлкен жеңіс.
Алда қысқа демалыс, сосын жаңадан дайындық басталады. Жеңісте де, қиын күндерде де бірге болғандарыңыз үшін рахмет. Сіздердің сенімдеріңіз маған күш береді. Кортта кездескенше. Алға, Қазақстан! – деп жазды Елена Рыбакина.
Еске сала кетейік, бұдан бұрын Елена Рыбакинаның әлемдік рейтингіде үздік бестікке енгенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).