Қазақстан оқушылары «Жас жол инспекторлары» халықаралық байқауында жүлдегер атанды
АСТАНА. KAZINFORM – «Жас жол инспекторлары» халықаралық байқауы Тәжікстанда өтті, - деп жазды Polisia.kz.
Байқауға Тәуелсіз Мемлекеттер Достастығына (ТМД) мүше Тәжікстан, Өзбекстан, Қырғызстан, Қазақстан, Ресей Федерациясы, Әзірбайжан және Беларусь елдерінің командалары қатысты.
Байқаудың мақсаты – жасөспірімдерді құқықтық тұрғыдан тәрбиелеу және оларға жол жүрісі қағидаларын үйрету. Сайыс 15–20 шілде аралығында Тәжікстанның Соғды облысындағы Гулистон қаласында ТМД елдерінің жас жол инспекторларының ІІІ Мемлекетаралық слеті аясында өтті.
Байқау қорытындысы бойынша бірінші орынды Беларусь командасы иеленсе, екінші орынды Қазақстан оқушылары жеңіп алды.
Халықаралық аренада еліміздің намысын Ақтау қаласындағы №8 жалпы білім беретін мектептің жас жол инспекторлары қорғады. Қазақстандық команда жоғары дайындық деңгейін, терең білімін және мықты командалық рухын көрсетті.
Айта кетейік, қазақстандық оқушылар әлемдегі ең беделді олимпиадада 6 медаль жеңіп алды.