Қазақстан Ресейге шегірткенің таралу ошақтары жайлы өзара ақпараттандыруды ұсынды

АСТАНА. ҚазАқпарат - ҚР Ауыл шаруашылығы министрлігі Сочиде өтіп жатқан Қазақстан мен Ресейдің АӨК саласындағы XIIөңіраралық ынтымақтастық пен азық-түлік қауіпсіздігін қамтамасыз ету форумының жалпы отырысы барысында шегірткелердің жаппай пайда болу және таралу ошақтары туралы өзара ақпараттандыру бойынша белсенді бірлескен жұмыс жүргізуді ұсынды.

Сондай-ақ шегіртке зиянкестерінің іргелес аумақтарға көшіп-қонуын болдырмау және оған қарсы тиімді жұмыс жүргізу мақсатында оның жаппай пайда болу және таралу ошақтарын жоюда іс-әрекеттерді үйлестіру, аумақтарды зерттеу мониторингін өткізу ұсынылды.

Ресей Федерациясының шекаралас аумақтарынан жыл сайын шегіртке зиянкестерінің Қазақстан аумағына көшіп-қону қаупі туындап отырады. Шегірткеге қарсы жүргізілетін шараларды қаржыландыру тетігіндегі айырмашылықтар бұған себепші болатын факторлардың бірі. Қазақстанда бұл жұмыстар республикалық бюджет есебінен қаржыландырылса, Ресейде мемлекеттік қордың жерлері ғана федералдық бюджет есебінен, ал шаруашылық субъектілерінің жерлері - жерді пайдаланушылар мен жер иелерінің қалтасынан төленіп, өңделеді. Сондықтан шегірткелермен қарсы күрес бойынша жұмыстың толық қамтылмауы байқалып отыр. Бұл мәселен, биылғы жылы Қостанай облысының аумағына Орынбор облысынан шегірткелердің ұшып келуіне әкеліп соқтырды.