Қазақстан Республикасының қаржылық тұрақтылығы жəне қаржы нарығын дамыту жөніндегі кеңес құрылды - ҚР Ұлттық банкі

АСТАНА. Шілденің 1-і. ҚазАқпарат - Ағымдағы жылғы маусымның 12-сінде «Қазақстан Республикасының қаржылық тұрақтылығы жəне қаржы нарығын дамыту жөніндегі кеңес туралы» Қазақстан Республикасы Президентінің № 994 Жарлығына қол қойылды. Жарлықтың мəтінімен Ұлттық Банк сайтының «Қаржы тұрақтылығы» бөлімінде танысуға болады.

Қазақстан Республикасының қаржылық тұрақтылығы жəне қаржы нарығын дамыту жөніндегі кеңес Қазақстан Республикасының Президенті жанындағы консультативтік-кеңесші орган ретінде құрылды, оның негізгі мақсаты Қазақстан Республикасының қаржылық тұрақтылығын қамтамасыз ету жəне қаржы секторын тиімді дамыту мəселелері бойынша ведомствоаралық үйлестіру болып табылады. Кеңес функцияларының құрамына:

1) реттеуші мониторинг деректерінің негізінде қаржылық тұрақтылық үшін жүйелік тəуекелдер бойынша ұсыныстарды тұжырымдау;

2) Қазақстан Республикасының қаржы жүйесін дамыту саласында мемлекеттік саясаттың негізгі бағыттарын əзірлеу жəне іске асыру жөніндегі тəсілдерді тұжырымдау;

3) жүйелік тəуекелдерді барынша азайту жəне қаржылық тұрақтылыққа қатердің алдын алу мақсатында қаржы секторын реттеудің стратегиясы мен қағидаттарын қалыптастыру бойынша ұсыныстарды тұжырымдау;

4) қаржылық тұрақтылыққа қолдау көрсетуге бағытталған реттеуші жəне ынталандырушы шараларды қолдану жөніндегі ұсынымдарды дайындау кіреді.

Кеңес төрағасы - Қазақстан Республикасы Ұлттық Банкінің төрағасы - Григорий Марченко;

Кеңестің құрамына: Данияр Ақышев - Ұлттық Банк төрағасының орынбасары; Елена Бахмутова - Қаржы нарығын жəне қаржы ұйымдарын реттеу мен қадағалау агенттігінің төрайымы; Мəжит Есенбаев - Бəсекелестікті қорғау агенттігінің төрағасы; Болат Жəмішев - Қазақстан Республикасы Қаржы министрі; Бақыт Сұлтанов - Қазақстан Республикасы Президентінің көмекшісі; Серік Аханов - «Қазақстан қаржыгерлерінің қауымдастығы» заңды тұлғалар бірлестігінің төрағасы; кіреді.

Кеңестің жұмыс органы Ұлттық Банк болып табылады.

Кеңестің бірінші отырысы ағымдағы жылғы маусымның 30-ында өткізілді.

Мынадай мəселелер қаралды:

- Халықаралық практикада қабылданған реттеу қағидаттарын ескере отырып, қаржы институттарын капиталдандыруды кезең-кезеңмен арттыру туралы;

- «Қазақстан Республикасының кейбір заңнамалық актілеріне банк қызметін жəне қаржы ұйымдарын реттеу мəселелері бойынша тəуекелдерді азайту бөлігінде өзгерістер мен толықтырулар енгізу туралы» Қазақстан Республикасының Заңы жобасының бірқатар тұжырымдамалық жағдайлары туралы;

- Қаржы жүйесінің тұрақтылығы тұрғысынан алғанда ақшаны жылыстату мен лаңкестікті қаржыландыруға қарсы іс-əрекет жүйесі жұмысының кейбір аспектілері туралы.

Сондай-ақ Кеңестің келесі отырысын ағымдағы жылғы шіленің 16-сында өткізу туралы шешім қабылданды. Бұл отырыста екінші деңгейдегі банктердің қатысуымен қаржы секторының тəуекелдерін барынша азайту жөнінде келісілген ұстанымды əзірлеу жəне заңнамалық бастамалар туралы мəселе қаралады деп болжануда.