06:38, 12 Қыркүйек 2023

Қазақстан тәуелсіздік жылдарында жазғы Азиададан қанша медаль жеңіп алды

АСТАНА. ҚазАқпарат - Қытайдың Ханчжоу қаласында өтетін жазғы Азия ойындарының басталуына санаулы күндер ғана қалды, деп хабарлайды ҚазАқпарат тілшісі.

Осы орайда өткен ойындарды еске түсіре кеткенді жөн санап отырмыз.

Жазғы Азиадаға Қазақстан тәуелсіз ел ретінде 1994 жылдан бастап қатыса бастады. Содан бүгінгі күнге дейін Қазақстан құрамасы 7 мәрте жарыс жолына шықты.

Қазақ спортшылары алғашқы жазғы Азиадаға жеке ел ретінде Жапонияның Хиросима қаласында өткен ойындардан бері қатыса бастады.

Онда отандастарымыз 25 алтын, 26 күміс, 26 қола медальмен жалпыкомандалық есепте төртінші орынға табан тіреді.

Екінші ойынды 1998 жылы Бангкокте өткізіп, Таиландтан кейінгі 5-орынға тұрақтады.

Ал 2002 жылы Оңтүстік Кореяның Пусан қаласында өткен ойында 20 алтын, 26 күміс, 30 қола медальмен 4-орынға қайта орнықты.

2006 жылы Қатарда да төрттіктен түскен жоқпыз.

2010 жылы Қытайдың Гуанчжоу қаласында өткен додада алдымызға Иранды жіберіп, 5-орынға сырғыдық.

Ал 2014 жылы Оңтүстік Кореяның Инчхон қаласында өткен XVII жазғы Азиадада 28 алтын, 23 күміс, 33 қола медальмен үздік төртінші орынға қайта қол жеткіздік.

Одан кейін ел спортшылары 2018 жылы Индонезияның Джакарта және Паленбанг қалаларында өткен Сарықұрлық додасында бақ сынады.

Онда ел намысын 419 спортшы қорғап, 15 алтын, 17 күміс, 44 қола медальмен жалпы есепте 9-орынға табан тіреді.

Жазғы Азиадада Қазақстан спортшылары мен үздік үштікті түйіндеген елдердің медальдар кестесі:

1994 жыл. XII - Хиросима - Жапония

№	Мемлекет	Алтын	Күміс	Қола	Барл.
1	Қытай	125	83	58	266
2	Жапония	64	75	79	218
3	Оңтүстік Корея	63	56	64	183
4	Қазақстан	25	26	26	77

1998 жыл. XIII. Бангкок - Тайланд

№	Мемлекет	Алтын	Күміс	Қола	Барл.
1	Қытай	129	78	67	274
2	Оңтүстік Корея	65	46	53	164
3	Жапония	52	61	68	181
4	Таиланд	24	26	40	90
5	Қазақстан	24	24	30	78

2002 жыл. XIV. Пусан - Оңтүстік Корея

№	Мемлекет	Алтын	Күміс	Қола	Барл.
1	Қытай	150	84	74	308
2	Оңтүстік Корея	96	80	84	260
3	Жапония	44	74	72	190
4	Қазақстан	20	26	30	76

2006 жыл. XV. Доха - Қатар

№	Мемлекет	Алтын	Күміс	Қола	Барл.
1	Қытай	165	88	63	316
2	Оңтүстік Корея	58	52	82	192
3	Жапония	50	71	78	199
4	Қазақстан	23	20	42	85

2010 жыл. XVI. Гуанчжоу - Қытай

№	Мемлекет	Алтын	Күміс	Қола	Барл.
1	Қытай	199	119	98	416
2	Оңтүстік Корея	76	65	91	232
3	Жапония	45	74	94	216
4	Иран	20	14	25	59
	Қазақстан	18	23	38	79

2014 жыл. XVII. Инчхон - Оңтүстік Корея

№	Мемлекет	Алтын	Күміс	Қола	Барл.
1	Қытай	151	109	83	343
2	Оңтүстік Корея	79	71	84	234
3	Жапония	47	76	76	199
4	Қазақстан	28	23	33	84

2018 жыл. XVIIIДжакарта, Паленбанг (Индонезия)

№	Мемлекет	Алтын	Күміс	Қола	Барл.
1	Қытай	132	92	65	289
2	Жапония	74	56	74	204
3	О. Корея	49	58	70	177
...9	Қазақстан	15	17	44	76

Енді кезекті Сарықұрлық додасы Қытайдың Ханчжоу қаласында 23 қыркүйек пен 8 қазан аралығында өтеді.

Айта кетейік, Азия ойындарында Қазақстанның туын боксшы Асланбек Шымбергенов пен жеңіл атлет Надежда Дубовицкая көтеріп шығады.

Жалпы жарыста 40 спорт түрінен медальдар жиынтығы сарапқа салынады.

Азиада Азия чемпионаты Спорт

Күнсұлтан Отарбай

Еуразия Ұлттық университетінің түлегі. Республикалық «Қазақ спорты», «Sport» газеттерінде қызмет атқарған. 2014 жылғы Сочи, 2016 жылғы Рио-Де Жанейро, 2017 жылғы Инчхон және 2024 жылғы Париж Олимпиадасында, сонымен қатар бір қанша Қысқы және Жазғы Азия ойындарынан, әлем біріншіліктеріне барып тікелей хабар таратқан журналист. Сейдақмет Бердіқұлов атындағы арнайы сыйлықтың лауреаты.