Қазақстан Үкіметі Жаңаөзенді дамыту бойынша бағдарлама құрады
17:06, 28 Желтоқсан 2011
АСТАНА. 28 желтоқсан. ҚазАқпарат /Руслан Ғаббасов/ - Қазақстан Үкіметі Жаңаөзенді дамыту бойынша бағдарлама құрады. Бұл туралы бүгін үкімет отырысында Ақтаудан селекторлық кеңес арқылы байланысқан «Самұрық-Қазына» қорының басшысы Өмірзақ Шөкеев мәлім етті.
Айта кетейік, Ө. Шөкеев бүгінде аталған қаладағы жаппай тәртіпсіздік салдарын жоюға байланысты үкіметтік комиссияға басшылық етуде. Ө. Шөкеевтің сөзіне қарағанда, қазіргі кезде Жаңаөзен қаласындағы және Шетпе кентін тазарту бойынша жұмыстар жүріп жатыр. Бұл жұмыстарға 1000-ға жуық жергілікті тұрғындар жұмылдырылды. Оның пайымдауынша, қалада жөндеу және жол құрылысы бойынша жұмыстар жүргізілуі керек. «Ол үшін арнайы бағдарламаны әзірлеу ұсынылып отыр. Экономикалық даму және сауда министрлігіне әкімдікпен бірлесе және басқа да органдармен бірге Жаңаөзен қаласын дамыту бойынша бағдарламаны жедел әзірлеу ұсынылады. Сондай-ақ олар бұл жұмыстарға қанша қаржы керектігін талқылауы тиіс», - деді Ө. Шөкеев.