Қазақстан және БАӘ каратэ федерациялары меморандумға қол қойды
АСТАНА. KAZINFORM — Бүгін Фуджайра қаласында Қазақстан мен Біріккен Араб Әмірліктерінің каратэ федерациясы ынтымақтастық жөнінде меморандумға қол қойды.
Қазақстан каратэ федерациясының баспасөз қызметі мәлім еткендей, тараптар арасындағы жиынға Қазақстан каратэ федерациясының вице-президенті Болат Хавлахат, БАӘ-нің каратэ федерациясының президенті, генерал-майор Нассер Әл-Разуки мен Қазақстанның Дубай қаласындағы Бас консулы Алмаз Тасболат қатысты.
Тараптар біраз пікір алмасқаннан кейін Болат Хавлахат пен Азия каратэ федерациясының вице-президенті Рашид әл-Әли мырза маңызды құжатқа қол қойды.
Осыдан соң Халықаралық каратэ федерациясы вице-президенті, Азия каратэ федерациясының президенті қызметін қоса атқаратын Нассер Әл-Разуки баспасөз жиынында сөз сөйледі. Ол бұл келісім каратэ спортын екі елде жаңа деңгейге көтеруге жол ашатынына сенім білдірді. Әрі Қазақстан каратэ спортшыларының айтулы жетістіктері мен федерациясының қарқынды жұмысын атап өтіп, жоғары баға берді.
Өз кезегінде Болат Хавлахат Нассер Әл-Разуки мырзаға «ҚР-ның Құрметті спорт қызметкері» төсбелгісін табыстады.
Жастар арасындағы А сериясындағы турнир аясында жүзеге асқан бұл іс алдағы уақытта Ұлттық құрамалардың бірлескен оқу-жаттығу жиындарын көптеп өткізуіне жол ашады.
Естеріңізге сала кетейік, осыған дейін Дінмұхаммед Айдарбек Fujairah Open турнирінің жеңімпазы атанғанын жазған болатынбыз.