АСТАНА. KAZINFORM – Қазақстан жасөспірімдер құрамасы Манама қаласында (Бахрейн) шпагамен семсерлесуден әлем кубогы кезеңінің жеңімпазы атанды.
Ел құрамасы сапында Ғабиден Мұстафин, Нұржан Әбжанов, Кирилл Проходов және Алексей Касаткин өнер көрсетті.
Соңғы екі жыл қатарынан күміс жүлде алған команда биыл тұңғыш рет чемпиондық атаққа қол жеткізді.
Қазақстандықтар 1/8 финалда Үндістан құрамасын 45:35 есебімен тізе бүктірді. Ширек финалда Сауд Арабиясынан 45:36 есебімен басым түсті.
Жартылай финалда Қытайды 45:25 есебімен ойсырата ұтты.
Алтын жүлде үшін соңғы бәсекеде Франциямен кездескен Қазақстан құрамасы ұтылып жатып, жеңісті жұлып алды – 44:43.
Қыздар арасында Каролина Фомина, Кристина Красикова, Наталья Зинякова және Арина Яковлева Қазақстан намысын қорғап, төртінші орыннан көрінді.
Еске сала кетейік, бұдан бұрын Қазақстан құрамасының шпагамен семсерлесуден әлем кубогы кезеңінде күміс жүлдеге ие болғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).