Қазақстанда апта ішінде болған кадрлық тағайындаулар
АСТАНА. KAZINFORM — Осы аптада еліміздің орталық және жергілікті атқарушы органдарында бірқатар кадрлық ауыс–түйіс болды.
Апта басында Ақтау қаласы әкімінің орынбасары ауысты. Бұл қызметке Әсет Шопанов келді.
Ол Ш. Есенов атындағы Ақтау мемлекеттік университетін бітірген.
Еңбек жолын 2002 жылы Бейнеу ауданы әкімі аппаратының бас маманы болып бастаған, 2003-2018 жылдары Бейнеу ауданы әкімдігінде түрлі лауазымдарда қызмет атқарды.
2018-2020 жылдары Маңғыстау облысының жұмыспен қамтуды үйлестіру және әлеуметтік бағдарламалар басқармасында әртүрлі лауазымдарды атқарды.
2020-2022 жылдары Маңғыстау облысының жұмыспен қамтуды үйлестіру және әлеуметтік бағдарламалар басқармасы басшысының орынбасары қызметін атқарды.
2022-2024 жылдары Маңғыстау облысының жұмыспен қамтуды үйлестіру және әлеуметтік бағдарламалар басқармасының басшысы болды.
Адам құқықтары жөніндегі уәкілдің Қостанай облысы бойынша өкілі тағайындалды. Аталған лауазымға Мақсат Шәкірбаев келді.
Шығыс Қазақстан облысы бойынша экономикалық тергеу департаментінің басшысы болып Арман Жүнісов тағайындалды.
Арман Оразұлы 1977 жылы Өскемен қаласында туған. Мамандығы — экономист-заңгер. Жоғарғы сот жанындағы Құқық қорғау академиясын аяқтаған.
Еңбек жолын 1999 жылы ҚР Сот сараптамасы орталығының ШҚО және Астана қаласындағы өңірлік мекемелерінде бастады.
2007-2019 жылдары Мемлекеттік қызмет істері агенттігінің елордалық департаментінде бірқатар қызметте жұмыс істеді. Соның ішінде Астана қаласы Қаржы полициясы департаментінің Тергеу басқармасының бастығы лауазымын атқарған.
2019-2020 жылдары ҚР Қаржы министрлігі Қаржы мониторинг комитеті тергеу департаментінің басшысы болып еңбек етті.
Осы лауазымға тағайындалмас бұрын Павлодар облысы бойынша экономикалық тергеу департаментін басқарған.
Қазақстан СІМ Халықаралық ақпарат комитетінің төрағасы — Ресми өкілі ретінде Айбек Смадияров тағайындалды.
Айбек Смадияров 1983 жылғы 7 шілдеде Оңтүстік Қазақстан облысында дүниеге келген. 2004 жылы Абылай хан атындағы Қазақ халықаралық қатынастар және әлем тілдері университетін бітірген.
Еңбек жолын 2005 жылы «Қазақстандағы Қытай банкі» АҚ Административтік департаментінің маманы ретінде бастаған. 2006 жылдан 2008 жылға дейін Қазақстан Республикасының Сыртқы істер министрлігі Консулдық қызмет департаментінің маманы ретінде қызмет атқарды.
2008-2010 жылдары ҚР СІМ Еуропа департаментінің атташесі және үшінші хатшысы лауазымдарында жұмыс істеді.
2010-2012 жылдар аралығында Қазақстанның Мажарстандағы Елшілігінде үшінші хатшы қызметін атқарды.
2012 жылдан 2013 жылға дейін ҚР Президентінің Баспасөз қызметінде сарапшы, ал 2013-2014 жылдары ҚР СІМ Сыртқы саяси сараптау мен болжамдау комитетінің бірінші хатшысы лауазымын атқарды.
2014 жылдан 2018 жылға дейін Вьетнамдағы ҚР Елшілігінде екінші және бірінші хатшы қызметінде жұмыс істеді.
2018-2019 жылдары ҚР СІМ Баспасөз қызметін басқарып, 2019-2023 жылдар аралығында ҚР СІМ Халықаралық ақпарат комитеті төрағасының орынбасары — Баспасөз хатшысы лауазымын атқарды.
ҚР СІМ Халықаралық ақпарат комитетінің төрағасы болып тағайындалғанға дейін 2023 жылғы маусымнан бастап ҚР СІМ Коммуникациялар департаментінің директоры — Ресми өкілі болды. II сыныпты Төтенше және Өкілетті Уәкіл дипломатиялық дәрежесіне ие. Қазақ, орыс, ағылшын және түрік тілдерін меңгерген.
Сәрсен Құранбек Шымкент қаласы әкімдігінің ресми өкілі болып бекітілді.
Сәрсен Абайұлы 1976 жылы Алматы облысы Кербұлақ ауданы Қызылжар ауылында туған.
Әл-Фараби атындағы Қазақ ұлттық мемлекеттік университетін бітірген. Сондай-ақ қазақтың спорт және туризм академиясы мен «Қазтұтыну» одағы Қарағанды экономикалық университетінің түлегі. Мамандығы — философия, дене шынықтыру мәдениетінің оқытушысы, каратэ жаттықтырушысы, құқықтанушы.
Сәрсен Абайұлы еңбек жолын 1995 жылы Алматы қаласындағы «№ 4 олимпиадалық резервтегі мамандандырылған балалар-жасөспірімдер мектебі» мемлекеттік коммуналдық қазыналық кәсіпорнының жаттықтырушы-оқытушысы болып бастады.
2003–2023 жылдар аралығында жеке секторда және орталық мемлекеттік органдарда жауапты басшылық қызметтер атқарды.
2023 жылдың ақпан айынан бастап 8 қарашаға дейін Мәдениет және спорт вице-министрі лауазымында еңбек етті.
2023 жылдың 8 қарашасынан бастап Шымкент қаласы әкімінің орынбасары қызметін атқарды.
Абай облысы экономикалық тергеу департаментінің басшысы болып Ержан Бөлегенов тағайындалды.
Ержан Ерғалиұлы 1978 жылы Оңтүстік Қазақстан облысында туған. Абай атындағы Алматы мемлекеттік ұлттық университетінің заң факультетін бітірген.
Еңбек жолын Астана қаласының прокуратурасында бастаған. 2009-2015 жылдары Астана қаласының Есіл ауданы және Ақмола облысы Көкшетау қаласының прокуроры қызметтерін атқарды.
2015-2018 жылдары Павлодар қаласының прокуроры. 2018-2019 жылдары Оңтүстік Қазақстан облысы прокурорының орынбасары. 2019 жылдан 2021 жылға дейін Түркістан облысы прокурорының орынбасары.
2021 жылғы наурыздан бастап осы уақытқа дейін ҚР Қаржылық мониторинг агенттігінің Қостанай облысы бойынша экономикалық даму департаментінің басшысы болып жұмыс істеді.
Қаржылық мониторинг агенттігі төрағасының бұйрығымен Атырау облыстық экономикалық тергеп-тексеру департаментінің басшысы лауазымына Нұрлан Кәрімов тағайындалды.
Нұрлан Махсотұлы 1981 жылы Батыс Қазақстан облысында туған. Экономикалық тергеу қызметінің полковнигі.
Оның екі жоғары білімі бар. Қаржы полиициясы академиясын, Батыс Қазақстандағы «Еуразия» менеджмент және тілдер институтын бітірген.
Еңбек жолын 2002 жылы бастаған. Содан бері қаржы полициясы органында тергеуші, аға тергеуші болып жұмыс ітеген. Экономикалық және сыбайлас жемқорлықпен күрес агентігінде, Қаржы министрлігінде, экономикалық тергеу органында лауазымды қызмет атқарған.
Ал 2022 жылы Абай облысының экономикалық тергеп-тексеру департаментінің басшысы болып тағайындалған.
Серік Сермағамбетов ҚР АШМ Балық шаруашылығы комитетінің төрағасы болып тағайындалды.
Серік Сағитжанұлы Сермағамбетов 1965 жылы 29 қаңтарда Қызылорда облысы Қазалы ауданында дүниеге келген.
«Экономист» (Алматы халық шаруашылығы институты) және «заңгер» (Л. Н. Гумилев атындағы Еуразия университеті) мамандықтары бойынша екі жоғары білімі бар.
Еңбек жолын 1988 жылы Алматы қаласында Балық шаруашылығы министрлігінің орталық материалдық-техникалық жабдықтау базасында бас экономист болып бастаған.
Әр жылдары Қызылорда балық зауытының экономист-қаржыгері, әкім аппаратының аға инспекторы, Қызылорда облысы аппаратының басшысы, Қызылорда облысы Шиелі ауданы әкімінің орынбасары, Қызылорда облысы Кәсіпкерлік және өнеркәсіп басқармасының басшысы қызметтерін атқарған.
Сондай-ақ, Қызылорда облысы Жалағаш және Арал ауданының әкімі, «Байқоңыр» ӘКК АҚ ҰК Басқарма төрағасының орынбасары қызметтерін атқарды.
Тағайындалғанға дейін Қызылорда облысының Табиғи ресурстар және табиғатты пайдалануды реттеу басқармасының басшысы қызметін атқарды.
Қазақстан таеквондо федерациясының бас хатшысы болып Арал Садықов тағайындалды. Бұған дейін ол Қазақстан таеквондо федерациясының бірінші вице-президенті болған.
Жоғары аудиторлық палатаның мүшесі қызметіне Амангелді Исенов тағайындалды.
Амангелді Исенов 2000 жылдан бастап мемлекеттік қызметте. 2004 жылдан бастап квазимемлекеттік сектор құрылымында экономика және қаржы мәселелері бойынша басшылық қызметтерді атқарған.
Бұған дейін Еуразиялық даму банкінің басқарма төрағасының орынбасары, Қазақстан Даму банкінің басқарма төрағасының орынбасары қызметін атқарды. Экономика саласындағы жетістіктері үшін Ерен еңбегі медалімен марапатталған.
Жамбыл облысы әкімінің өкіміне сәйкес Шалқар Болатұлы Амантұров цифрландыру және архивтер басқармасының басшысы лауазымына тағайындалды.
Шалқар Болатұлы 1982 жылы дүниеге келген. Білімі жоғары. Оңтүстік Қазақстан политехникалық колледжін «Есептеу техникасы мен автоматтық жүйелерге арналған бағдарламалық қамтамасыз ету», Алматы экономика және статистика институтын «Қаржы және несие», Қазақ инженерлік-техникалық академиясын «Ақпараттық жүйелер» мамандықтары бойынша бітірген.
Еңбек жолын 2002 жылы Шымкент қаласындағы ҚР Қаржы министрлігінің Оңтүстік Қазақстан облысы бойынша Салық комитетінің ақпараттық технологиялар басқармасының бас маманы болып бастаған.
2006-2009 жылдары ҚР Қаржы министрлігінің Астана қаласы бойынша Салық комитетінің ақпараттық технологиялар бөлімінің бастығы, басқарма бастығы;
2009-2013 жылдары ҚР Байланыс және ақпарат министрлігінің «Телекоммуникациялар саласындағы техникалық қолдау және талдау орталығы» РМК Ақпараттық технологиялар департаменті Ақпараттық қауіпсіздік басқармасының CERT қызметінің жетекші маманы, «Электрондық үкімет қауіпсіздігі мониторингі орталығы» бөлімінің жетекші инженері;
2013-2014 жылдары ҚР Көлік және коммуникация министрлігінің «Телекоммуникациялар саласындағы техникалық қолдау және талдау орталығы» ШЖҚ РМК-ның Эксплуатация басқармасы техникалық қолдау қызметінің басшысы;
2014-2017 жылдары ҚР Көлік және коммуникация министрлігінің «Телекоммуникациялар саласындағы техникалық қолдау және талдау орталығы» ШЖҚ РМК Эксплуатация басқармасының Ақпараттық технологиялар департаменті директорының орынбасары, директоры;
2017-2018 жылдары Астана қаласындағы «Транстелеком» АҚ Орталық аппаратының «Желілерді жаңғырту және дамыту» бағытының басшысы;
2018-2019 жылдары «Зерде» ұлттық инфокоммуникациялық холдингі» АҚ-ның Архитектураны дамыту департаменті Цифрлық трансформация бөлімінің басшысы;
2019-2021 жылдары Астана қаласындағы «Электрондық қаржыландыру орталығы» АҚ Кірістерді цифрландыру, есепке алу және бақылау департаментінің директоры;
2021-2022 жылдары «ҚР Стратегиялық жоспарлау және реформалар агенттігі Ұлттық статистика бюросының Ақпараттық-есептеу орталығы» ШЖҚ РМК Жобаларды басқару департаментінің директоры, директорының орынбасары.
2022 жылы Астана қаласындағы «Аграрлық сектордағы экономикалық саясаттың талдау орталығы» ЖШС Басқарма төрағасының кеңесшісі лауазымдарында жұмыс істеді.
2022 жылдың қараша айынан бастап Астана қаласындағы «Аграрлық сектордағы экономикалық саясаттың талдау орталығы» ЖШС Басқарма төрағасының орынбасары лауазымында қызмет атқарып келді.
Қазақстан Республикасы Денсаулық сақтау министрінің бұйрығымен Бауыржан Әлішерұлы Жүсіпов Министрліктің Медициналық және фармацевтикалық бақылау комитетінің төрағасы қызметіне тағайындалды.
1981 жылы Шымкент қаласында дүниеге келген. Оңтүстік Қазақстан мемлекеттік медицина академиясын, «Астана медицина университеті» АҚ бітірген.
Еңбек жолын 2002 жылы Шымкент қаласы, Қалалық жедел медициналық жәрдем көрсету стансасы желілік бригадасының фельдшері болып бастаған.
2006–2008 жылдары — Астана қаласы, Қазақ мемлекеттік медицина академиясының «Хирургия» мамандығы бойынша клиникалық ординаторы.
2008–2010 жылдары — Астана қаласы, «Ұлттық ғылыми медициналық орталық» РМК гинекология бөлімшесінің дәрігер-ангиохирургы.
2010 жылдан 2013 жылға дейін ҚР Денсаулық сақтау министрлігі Ғылым және адами ресурстар департаменті Медициналық ғылым және білім басқармасының сарапшысы, «Республикалық шұғыл медициналық көмек ғылыми орталығы» АҚ білім бөлімінің маманы, түрлі медициналық холдингтер мен ұйымдарда менеджер, бас менеджер болып жұмыс істеді.
2013–2014 жылдары — Астана қаласы, «Республикалық диагностикалық орталық» АҚ хирургия және ішкі аурулар бөлімінің ангиохирург дәрігері.
2014–2015 жылдары — Астана қаласы, «Республикалық диагностикалық орталық» АҚ диагностика орталығының басшысы.
2016–2017 жылдары — Астана қаласы, «University Medical Center» корпоративтік қоры Ядролық медицина және сәулелік диагностика орталығының басшысы.
2017–2018 жылдары — Астана қаласы, «Республикалық денсаулық сақтауды дамыту орталығы» ШЖҚ РМК Медициналық көмекті жетілдіру орталығының басшысы.
2018–2019 жылдары — ҚР Денсаулық сақтау министрлігі Медициналық көмекті ұйымдастыру департаменті амбулаториялық-емханалық және жедел медициналық көмек басқармасының басшысы.
2019–2020 жылдары — ҚР Денсаулық сақтау министрлігі Медициналық көмекті ұйымдастыру департаменті директорының орынбасары.
2021–2022 жылдары — ҚР Денсаулық сақтау министрлігі Дәрі-дәрмек саясаты департаментінің директоры.
2022–2024 жылдары — ҚР Президентінің Іс басқармасы ведомстволық қарасты ұйымдарын басқару бөлімінің бас инспекторы.
2024 жылғы шілдеден бастап қазіргі уақытқа дейін — ҚР Президентінің Іс басқармасы ведомстволық қарасты ұйымдарын басқару бөлімі меңгерушісінің орынбасары.
Қазақстан футзал қауымдастығының бас хатшысы тағайындалды. Бұл қызметке Мақсат Әлбекұлы Тюмалиев келді.
М.Тюмалиевтің футзал мен үлкен футболда тәжірибесі мол. Аталған қызметті бұрын атқарған Дәурен Нұрғожин футзалдан Қазақстан ұлттық құрамасында бас бапкер Пауло Рикардо Фигейраның көмекшісі ретінде жұмысын жалғастырады.
ҚР төтенше жағдайлар министрінің бұйрығымен Рашид Құлтайұлы Дубаев Өнеркәсіптік қауіпсіздік комитетінің төрағасы қызметіне тағайындалды.
1966 жылы Шығыс Қазақстан облысында дүниеге келген. Әл-Фараби атындағы Қазақ мемлекеттік университетін бітірген.
Еңбек жолын 1992 жылы Семей облысы Шар ауданы прокуратурасында тағылымгер-тергеуші болып бастаған.
1993-1997 жылдар аралығында Алматы облысы Әуезов ауданы прокурорының кеңесшісі, прокурор орынбасары қызметтерін атқарған.
1997 жылдан 2000 жылға дейін ҚР Бас прокуратурасы құрылымында құқық қорғау және салық органдарында тергеу және анықтау заңдылығын қадағалау басқармасының прокуроры, Бас прокурордың аға көмекшісі — Павлодар облысы бойынша Бас прокуратураның өкілі және басқа да лауазымды қызметтер атқарды.
2000–2002 жылдары — Павлодар облысы Әділет басқармасының бастығы.
2002–2005 жылдары — Алматы қаласы Әділет басқармасының бастығы.
2005–2009 жылдары — Павлодар облысы Әділет департаментінің бастығы.
2009–2010 жылдары — ҚР Әділет министрлігі «Ақпараттық-өндірістік орталығы» РМК директорының орынбасары, Астана қаласы.
2012–2014 жылдары — ҚР Бас прокуратурасының Ішкі қауіпсіздікті қамтамасыз ету басқармасы бастығы, Астана қаласы.
2014–2016 жылдары — Қарағанды облысы прокурорының бірінші орынбасары.
2022–2023 жылдары — ҚР ТЖМ Өнеркәсіптік қауіпсіздік комитетінің Абай облысы бойынша департамент басшысы.
2023 жылдың қыркүйегінен бастап қазіргі уақытқа дейін ҚР ТЖМ Өнеркәсіптік қауіпсіздік комитетінің Алматы қаласы бойынша департамент басшысы қызметін атқарды.
Семей қаласы әкімінің орынбасары болып Қуаныш Әбілдаев тағайындалды.
Қуаныш Әбілдаев 1989 жылы Қызылорда облысында дүниеге келген. Ол 2011 жылы Қазақ гуманитарлық заң университетін «Құқықтану» мамандығы, ал 2014 жылы Қорқыт Ата атындағы Қызылорда мемлекеттік университетін «Экономика» мамандығы бойынша тәмамдаған.
Еңбек жолын 2009 жылы Қызылорда облысы, Сырдария аудандық сотында жетекші маман ретінде бастаған. 2009 жылы Қызылорда облысы, Жалағаш аудандық сотында бас маманы, 2011-2016 жылдары Қызылорда облысының сот актілерін орындау департаментінде мемлекеттік сот орындаушы, ҚР Мемлекеттік қызмет істері агенттігінің Қызылорда облысы бойынша басқармасында консультант, консультант-инспектор қызметтерін атқарды.
2016-2019 жылдары ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Қызылорда облысы бойынша департаментінде мемлекеттік қызмет саласындағы бақылау басқармасының басшысы болды.
2019 жылдан осы уақытқа дейін Қызылорда облысының ішкі саясат басқармасы басшысының орынбасары лауазымын атқарды.
Қазақстан бокс федерациясының вице-президенті тағайындалды. Бұл қызметке Болат Абдрахманов келді. Ол аймақтармен жұмыс бойынша еңбек етеді.
Болат Абдрахманов 30 жылға жуық отандық спорт саласында еңбек еткен. «Құрмет» орденінің иегері. Әр жылдары бокстан мемлекеттік жаттықтырушы, ұлттық құрама үйлестірушісі және тағы басқа қызметтер атқарған.
55 жастағы маман қалалық білім бөлімінде жаттықтырушы, Олимпиадалық резервтегі балалар мен жасөспірімдер спорт мектебінің, Астана қаласының № 2 БЖСМ директоры болса, одан кейін «Локомотив» дене шынықтыру-спорт клубының аға жаттықтырушысы қызметін атқарды.
Одан кейінгі жылдарда «Олимпиадалық резервті дайындау орталығының» директоры, ҚР Туризм және спорт министрлігі Спорт комитетінің «Штаттық ұлттық командалар және спорт резерві дирекциясы» РМҚК бокстан мемлекеттік жаттықтырушы, «Тарлан Батырлары» ЖШС директоры болып еңбек етті.