Өрт ошақтары Ақмола және Солтүстік Қазақстан облыстарында, сондай-ақ Қарқаралы мемлекеттік ұлттық табиғи паркі мен «Семей орманы» мемлекеттік орман табиғи резерватында анықталған.
Өрт ошақтарын «Қазавиаорманқорғау» РМҚК-ның әуе және орман күзеті жерүсті патрульдеуі барысында анықтады.
Ақпарат түскен сәттен бастап өртті сөндіруге қажетті күштер мен құралдар жұмылдырылған.
– Өртті сөндіруге «Қазавиаорманқорғау» РМҚК тікұшақтары, мемлекеттік орман күзетінің және Төтенше жағдайлар департаментінің қызметкерлері қатысты. Мамандар өрттің одан әрі таралуына жол бермеді. Үйлесімді іс-қимылдың нәтижесінде өрт ошақтары жедел оқшауланды. Қазіргі уақытта бірқатар өңірде өртті толық сөндіру жұмыстары жалғасып жатыр, – делінген ақпаратта.
Жағдай тұрақты бақылауға алынған.
Айта кетейік, Қостанай облысында 600 гектар аумақты шарпыған өрт сөндірілді.