Қазақстанда эпидемиологиялық жағдай тұрақты - ҚР Денсаулық сақтау министрлігі

АСТАНА. 11 қазан. ҚазАқпарат - Елімізде ағымдағы жылдың 9 айы ішінде санитариялық-эпидемиологиялық жағдайды тұрақтандыру және инфекциялық аурулармен сырқаттанушылықты азайту бағытында елеулі жұмыс жүргізілді. Қазір республикада эпидемиологиялық жағдай тұрақты.

Бұл туралы ҚР Денсаулық сақтау министрлігінің баспасөз қызметі хабарлады.

Нәтижесінде тұрғындардың обамен, тырысқақпен, күйдіргімен, паратифпен, дифтериямен, полиомиелитпен, сіреспемен, безгекпен сырқаттанушылық жағдайлары тіркелген жоқ.

2011 жылдың осыған ұқсас кезеңімен салыстырғанда 30 нозологиялық түр бойынша төмендеу үндісі байқалады, оның ішінде қызамық 3,0 есеге, қызылша 47,9%-ға, жіті вирустық гепатиттер 37,1%-ға, оның ішінде: А гепатиті 37,8%-ға, С гепатиті 36,1%-ға, В гепатиті 31,6%-ға, көкжөтел 26,5%-ға, қышыма 29,3%-ға, менингококк  инфекциясы 25,5%-ға, сарып ауруы 17,9%-ға, жіті ішек инфекциясының таяқшалары  2,7%-ға, тыныс алу мүшелерінің туберкулезі 6,2%-ға, эхинококкоз 6,2%-ға, ротавирустық энтерит 3,5%-ға, сальмонеллез 2,9%-ға төмендеді.