Қазақстанда фитнес-орталық абонементі қанша тұрады

Фото: Фото: Александр Павский/ Kazinform

АСТАНА. KAZINFORM – Қазақстан қалаларында фитнес және жаттығу залдары көп. Кейбірі әйелдерге, кейбірі ерлерге деп бөлек зал қарастырған. Сонымен бірге аралас фитнес-клубтар да бар.

Абонемент ақысын салыстырған кезде бір айға арналғаны сараланды. Онда 8-10 жаттығу сабағы кіреді. Ең арзаны Тараз қаласында болып шықты. Мұнда бір айға арналған абонемент бағасы 5 000 теңгеден басталып, 15 000 теңгеге дейін жетеді. Содан кейінгі орында Қостанай қаласы тұр. Мұнда баға 6400 теңгеден басталады.

Айтып өтейік, кейбір жаттығу залындағы баға күндіз немесе кешкілік уақытқа қарай әртүрлі болады. Түске дейін барсаңыз, арзанға түседі. Содан кейінгі орында Павлодар мен Көкшетау қалалары тұр. Мұнда абонемент құны 7500 теңге. Қызылорда мен Жезқазғанда баға одан сәл қымбат, яғни, 8000 теңгеден басталады. Жезқазғанды бөлек алсақ, 30 000 теңгеге дейін жетеді.

Шымкентте бір айлық абонемент бағасы 9 500 теңгеден басталады. Орта есеппен 19 000 теңгеге дейін жетеді.

Ақтөбе, Өскемен, Қарағанды қалаларында фитнес және жаттығу залдарының бір айлық абонементі 10 000 теңгеден басталады. Қымбаты 30 000 теңгеге дейін жетеді. Еске сала кетейік, абонемент бағасына 8-10 жаттығу сабағы кіреді. Ал егер еш шектеусіз жаттығуды таңдасаңыз, баға көтеріле береді.

Ақтау мен Петропавлда бір айлық абонемент 11 000 теңгеден басталады. Түркістан, Талдықорған мен Оралда абонемент құны 12 000 теңгеден жоғары болып тұр.

Екінші орында Алматы қаласы тұр. Мұнда баға 13 500 - 40 000 теңге аралығында. Қазақстанның оңтүстік астанасында ірі және ұсақ фитнес, жаттығу залдары көп.

Семей, Атырау мен Астанада қызмет көрсету бағасы қымбат. Семей мен Атырауда баға 20 000 - 22 000 теңге тұрады. Ал Қазақстан астанасында абонемент бағасы 60 000 теңгеге дейін жетеді.

Жаттығу және фитнес залдарында бір реттік жаттығу құны 1500-5000 теңге аралығында. Сонымен бірге студенттерге, зейнеткерлерге, балалар мен әйелдерге арналғаны да бар. Ең қымбаты жеке жаттықтырушыны жалдау. Оның қызметі 30 000 - 40 000 теңге тұрады.

Еске салсақ, бұған дейін Қазақстандағы қызғалдақ және раушан гүлдердің бағасын білдік

Сонымен бірге ауызашар құны, қорқаушылар қызметі мен киноға билет бағасы сараланды.